06805

‘ओंकार’प्रश्नी आपासून बांद्यात ठिय्या आंदोलन

गुणेश गवस ः वनविभागाला इशारा

सकाळ वृत्तसेवा
बांदा, ता. २६ ः ‘ओंकार’ हत्तीवरील अत्याचारप्रकरणी वनखात्याने दिलेल्या आश्वासनांची पूर्तता न झाल्याचा आरोप करत वाफोली येथील सामाजिक कार्यकर्ते गुणेश गवस यांनी पुन्हा आक्रमक भूमिका घेतली आहे. दिलेल्या आश्वासनांबाबत आजपर्यंत कोणतीही कार्यवाही न झाल्याने गुरुवारपासून (ता. २७) येथील श्रीराम चौक येथे ठिय्या आंदोलन सुरू करणार असल्याचे त्यांनी लेखी निवेदनाद्वारे स्पष्ट केले आहे. समाधानकारक तोडगा न निघाल्यास बेमुदत उपोषणासह जनआंदोलन करण्याचा इशाराही त्यांनी दिला आहे.
याबाबत गवस यांनी पत्रक प्रसिद्धीस दिले आहे. त्यांनी १० नोव्हेंबरला ओंकार हत्तीला लाकडी दांड्याने मारहाण करणारे तसेच सुतळी बॉम्ब फेकून त्याला मानसिकदृष्ट्या अस्थिर करण्याचा प्रयत्न करणाऱ्या संबंधितांवर कठोर कारवाई करण्यात यावी, दोषींना सेवेतून निलंबित करावे तसेच ‘ओंकार’ला त्याच्या नैसर्गिक अधिवासात सोडावे, या मागण्यांसाठी आमरण उपोषण सुरू केले होते. त्यावेळी वनपरिक्षेत्र अधिकारी सुहास पाटील यांनी उपोषण मागे घेण्याची विनंती करत काही आश्वासने दिली होती; मात्र ही आश्वासने पूर्ण न करता वन खात्याने दिशाभूल केल्याचा आरोप गवस यांनी केला आहे. सुतळी बॉम्बचा वापर थांबवू, अशी हमी दिल्यानंतरही आठ दिवसांतच पुन्हा बॉम्ब फोडल्याचे त्यांनी नमूद केले आहे. वन खात्याच्या चुकीच्या माहितीमुळे व अपूर्ण आश्वासनांमुळे आंदोलनाचा पवित्रा घेतला असून वन विभागातील संबंधित अधिकारी व कर्मचारी जबाबदार असतील, असा इशाराही त्यांनी दिला आहे.