खेड बसस्थानकातील सीसीटीव्ही शोभेचेच
सकाळ वृत्तसेवा
खेड, ता. २ : खेड बसस्थानकातून मार्गस्थ होणाऱ्या बसफेऱ्यांमध्ये चढत असताना गर्दीचा फायदा उठवत चोरटे महिलांच्या गळ्यातील दागिन्यांसह पर्स हातोहात लांबवण्याच्या घटना घडत आहेत; मात्र बसस्थानकातील सीसीटीव्ही कॅमेरे नावापुरतेच उरले असल्याची बाबसमोर आली आहे.
बसस्थानकात चोऱ्यांसह प्रवाशांमध्ये हाणामारी अथवा तत्सम प्रकार घडल्यास अचूक बाबीचा वेध घेण्यासाठी सीसीटीव्ही कॅमेरे बसवण्यात आले आहेत; मात्र सद्यःस्थितीत सीसीटीव्ही यंत्रणा अडगळीत पडली असल्याचे समोर आले आहे. सणांच्या कालावधीत बसस्थानकातून महिलांचे दागिने चोरीस गेल्याच्या घटना घडल्या आहेत. या चोऱ्यांचा अद्यापही सुगावा लागलेला नाही. बसस्थानकातील सीसीटीव्ही कॅमेरे शोभेच्याच वस्तू बनल्या आहेत की काय, असा प्रश्न प्रवाशांकडून उपस्थित केला जात आहे. आधीच बसस्थानक समस्यांच्या नानाविध समस्यांच्या गर्तेत अडकले आहेत. मूलभूत सोयीसुविधांचाही थांगपत्ता नाही. त्यात सुरक्षिततेच्यादृष्टीने बसवण्यात आलेली सीसीटीव्ही कॅमेऱ्याची यंत्रणाही कोमात गेल्याने एसटी प्रशासनाच्या कारभाराचे पुरते धिंडवडे निघाले आहेत.