श्रीमद्भगवद्गीता शिकवणीचे
संस्कृत पाठशाळेत वर्ग
सकाळ वृत्तसेवा
रत्नागिरी, ता. ३ : येथील गोविंद कृष्ण रानडे संस्कृत पाठशाळेतर्फे येत्या जानेवारी महिन्यापासून श्रीमद्भगवद्गीता शिकवणी वर्ग सुरू केले जाणार आहेत. १२ ते ७० या वयोगटातील कोणीही या वर्गांमध्ये येऊन गीता शिकू शकणार आहे.
श्रीमद्भगवद्गीता शिकवणी वर्ग संस्कृत पाठशाळेत ३ जानेवारीपासून सुरू होणार असून, दर शनिवारी आणि रविवारी सायंकाळी ४ ते ५ या वेळेत होणार आहेत. यामध्ये तज्ज्ञ मार्गदर्शकांकडून गीतेचे सर्व म्हणजे १८ अध्याय शिकवले जाणार आहेत. प्रत्यक्ष आणि सामूहिक गीतापठणामुळे मानसिक ताण कमी होऊन मनःशांती मिळण्यासाठीही उपयोग होतो. या वर्गात येऊन गीता शिकू इच्छिणाऱ्यांनी २० डिसेंबरपूर्वी नाव नोंदवून प्रवेश निश्चित करावा, असे आवाहन संस्कृत पाठशाळेचे अध्यक्ष वैद्य मंदार भिडे आणि उपाध्यक्षा प्रतिभा प्रभुदेसाई यांनी केले आहे. पाठशाळेत नावनोंदणीसाठी संपर्क साधावा.