प्रवाशांकडून २ कोटी ३३ लाखाचा दंड वसूल
कोकण रेल्वेची मोहीम; एका महिन्यात ४२ हजार ९६५ फुकटे प्रवासी
सकाळ वृत्तसेवा
रत्नागिरी, ता. १० : कोकण रेल्वेतून विनातिकीट प्रवास करणाऱ्या फुकट्यांना रेल्वेप्रशासनाने चांगलाच दणका दिला आहे. सध्या कोरे मार्गावर तिकीट तपासणी मोहीम राबवण्यात आली. त्यामध्ये नोव्हेंबर महिन्यात कोकण रेल्वेने १ हजार ७० विशेष तिकीट तपासणी मोहीम राबवल्या. त्यात ४२ हजार ९६५ अनधिकृत, अनियमित प्रवासी आढळले. त्यांच्याकडून भाडे आणि दंड म्हणून एकूण २ कोटी ३३ लाख दंड वसूल केल्याचे कोरेकडून सांगण्यात आले.
कोकण रेल्वेने तिकीट तपासणी मोहीम तीव्र केली आहे. सुरक्षित आणि जबाबदार प्रवासावर लक्ष केंद्रीत करत कोकण रेल्वेने आपल्या मार्गावर तिकीट तपासणी मोहिमेत सातत्य ठेवले आहे. तिकीटविरहित प्रवासाला आळा घालणे आणि अधिकृत प्रवाशांसाठी सुरळीत, आरामदायी प्रवास सुनिश्चित हा या मोहिमेचा मुख्य उद्देश आहे. जानेवारी ते नोव्हेंबर २०२५ पर्यंत एकूण ७ हजार ४८३ विशेष मोहीम राबवण्यात आल्या. ज्यामध्ये २ लाख ९० हजार ७८६ अनधिकृत, अनियमित प्रवासी आढळले. या कालावधीत रेल्वेभाडे आणि दंड म्हणून १७ कोटी ८३ लाख रुपये वसूल केले आहेत.
कोकण रेल्वे सर्व प्रवाशांना प्रवास सुरू करण्यापूर्वी वैध तिकिटे खरेदी करण्याचे आवाहन करते. योग्य तिकिटाशिवाय प्रवास करणे हा गुन्हा आहे आणि संपूर्ण मार्गावर तिकीट तपासणी मोहिमा अधिक लक्ष केंद्रीत करून सुरू ठेवली आहे. सर्व अधिकृत प्रवाशांना सुरक्षित, सुरळीत आणि आरामदायी प्रवास सुनिश्चित करण्यासाठी कोकण रेल्वेने येत्या हिवाळा आणि ख्रिसमस सणांच्या काळात तिकीट तपासणी मोहीम अधिक तीव्र करणार असल्याचे सांगितले आहे.