- rat१०p२९.jpg-
२५O०९८२१
रत्नागिरी ः मार्गशीर्ष महिन्यामुळे शहरात फुलेविक्रीसाठी आलेले व्यावसायिक.

मागणी वाढल्याने फुलांचे दर चढेच!
मार्गशीर्ष महिना; झेंडूसह विविध फुले दाखल
सकाळ वृत्तसेवा
रत्नागिरी, ता. १० : सध्या मार्गशीर्ष महिना सुरू असल्यामुळे रत्नागिरी शहरातील फूलबाजारात मोठी आर्थिक उलाढाल होत आहे. स्थानिक विक्रेत्यांसह परजिल्ह्यातील शेतकरीही झेंडूसह अन्य प्रकारची फूले विक्रीसाठी घेऊन आलेले आहेत; मात्र आवक कमी असल्याने सध्या फुलाचे दर चढेच आहेत.
मार्गशीर्ष महिन्यातील प्रत्येक गुरूवारी घरोघरी लक्ष्मीमातेची विधिवत पूजा केली जाते त्याचबरोबर उपवासही केले जातात. घरोघरी चौरंगावर घट मांडून आकर्षक फुलं आणि फळांची आरास केली जाते. त्यामुळे या काळात फुले आणि फळांची मागणी मोठ्या प्रमाणात वाढली आहे. मार्गशीर्ष महिन्यातील लक्ष्मीपूजनाच्या निमित्ताने फुलांना असलेली ही प्रचंड मागणी लक्षात घेता पूजेसाठी रत्नागिरीतील बाजारपेठेत मोठ्या प्रमाणात फुलांची आवक झाली आहे. मागणीच्या तुलनेत आवक कमी असल्याने सध्या फुलांचे दर चांगलेच चढे आहेत. नेहमी १०० ते १२० रुपये प्रतिकिलो दराने मिळणारी फुलं आज २०० रुपये प्रतिकिलो दराने विकली जात आहेत. या फुलांच्या व्यवसायातून शहरात लाखो रुपयांची मोठी उलाढाल होत आहे. केवळ रत्नागिरी शहराचा विचार केल्यास, प्रत्येक गुरूवारी बाजारात कमीत कमी चार ते पाच टन फुलांची आवक होते. फुलांचा हा २०० रुपये प्रतिकिलो दर लक्षात घेतल्यास मार्गशीर्ष महिन्यातील प्रत्येक गुरूवारी रत्नागिरी शहरात केवळ फुलविक्रीतून लाखो रुपयांची उलाढाल होत आहे. धार्मिक श्रद्धेमुळे आणि लक्ष्मीमातेच्या पूजेसाठी लागणाऱ्या आवश्यक सामग्रीमुळे ही उलाढाल मोठ्या प्रमाणात वाढली आहे, ज्यामुळे स्थानिक फूलविक्रेत्यांना मोठा दिलासा मिळाला आहे.