10780

पांडुरंग काकतकर यांची
विज्ञान महोत्सवासाठी निवड

सकाळ वृत्तसेवा
सावंतवाडी, ता. १५ ः विज्ञान आणि तंत्रज्ञान मंत्रालय, भारत सरकारद्वारा पंजाब युनिव्हर्सिटी, चंदीगढ येथे आयोजित आंतरराष्ट्रीय विज्ञान महोत्सवासाठी (इंडिया इंटरनॅशनल सायन्स फेस्टिवल) सोनुर्ली माऊली माध्यमिक विद्यालयाचे विज्ञान शिक्षक तथा सिंधुदुर्ग जिल्हा विज्ञान मंडळाचे अध्यक्ष पांडुरंग काकतकर यांची निवड झाली आहे.
यात देश-विदेशातील शिक्षणतज्ज्ञ, शास्त्रज्ञ, अभ्यासक्रमाचे धोरणकर्ते, देशातील आयआयटीचे प्रमुख, सायन्स सेंटर्सचे प्रमुख सहभागी होणार आहेत. काकतकर हे गेली २८ वर्षे ग्रामीण भागात विज्ञानाचा प्रचार-प्रसार होण्यासाठी विविध उपक्रम राबवत आहेत. त्यांनी विज्ञान विषयाच्या अध्यापनात पूरक असे ई-लर्निंग, मिनी सायन्स सेंटर, सायन्स फेअर, अपूर्व विज्ञान मेळावा, विज्ञान नाट्य महोत्सव, विज्ञान प्रदर्शन, सायन्स ऑन व्हील, करियर गाईडन्स, व्हर्च्युअल रिॲलिटी असे अनेक उपक्रम घेतले आहेत. जिल्ह्यातील, तसेच सीमा भागातील अनेक शाळांमध्ये विद्यार्थ्यांना विज्ञान प्रयोगांची प्रत्यक्ष हाताळणी करता यावी, यासाठी ‘सायन्स ऑन व्हील’ उपक्रम राबविण्यात त्यांनी महत्त्वपूर्ण योगदान दिले. जिल्हा विज्ञान मंडळाचे ते अध्यक्ष असून राज्य विज्ञान शिक्षण संस्था रविनगर नागपूर, शिक्षण विभाग सिंधुदुर्ग व शैक्षणिक संस्था व विज्ञान मंडळाच्या माध्यमातून राज्यस्तरीय बालवैज्ञानिक प्रदर्शन, विज्ञान नाट्य महोत्सव आणि राज्यस्तरीय विज्ञान मेळावा असे जिल्ह्याच्या शैक्षणिक क्षेत्राचा दर्जा सिद्ध करणारे उपक्रम यशस्वीपणे आयोजन करण्यात त्यांनी महत्त्वपूर्ण भूमिका निभावली आहे.