ई-पीक पाहणी नोंदणीसाठी
तालुकास्तरीय समिती गठित
सकाळ वृत्तसेवा
सिंधुदुर्गनगरी, ता. १५ः विहित मुदतीत ई-पीक पाहणी नोंद न झालेल्या शेतकऱ्यांच्या पिकांची नोंद घेण्यासाठी समिती गठित केली आहे. राज्यात खरीप हंगाम १ ऑगस्टपासून सुरू झाला होता. त्यांतर्गत १ ऑगस्ट ते ३० सप्टेंबर या कालावधीत शेतकरी स्तरावरून तसेच १ ऑक्टोबरपासून सहाय्यक स्तरावरून ई-पीक पाहणी नोंदणी केली होती.
राज्यात बऱ्याच जिल्ह्यात उद्भवलेली नैसर्गिक आपत्ती, पीक विमा, पीक कर्ज या लाभांपासून कोणताही शेतकरी वंचित राहू नये, याकरिता सहायक स्तरावरून करावयाच्या पीक नोंदणीला ३० नोव्हेंबरपर्यंत मुदतवाढ देण्यात आली होती. हिवाळी अधिवेशनात राज्याचे महसूलमंत्री चंद्रशेखर बावनकुळे यांनी दिलेल्या आश्वासनानुसार उपविभागीय अधिकारी यांच्या अध्यक्षतेखाली विहित मुदतीत ई-पीक पाहणी नोंदणी न झालेल्या शेतकऱ्यांच्या पिकाची ऑफलाईन पाहणी करण्यासाठी समिती गठित करण्यात आली. या समितीमध्ये सदस्य म्हणून तहसीलदार, गटविकास अधिकारी आणि तालुका कृषी अधिकारी यांचा समावेश आहे. या समितीच्या फेरचौकशीमध्ये होणाऱ्या पीक नोंदीच्या अनुषंगाने शेतातील शेतमाल खरेदी केंद्रावर खरेदी करण्याच्या अनुषंगाने पणन विभागाने आवश्यक त्या पुढील सूचना निर्गमित करण्याची कार्यवाही करावी, असेही शासन निर्णयात नमूद केले आहे.