व्यावसायिक शेतीकडे वळा
विनोद हेगडे ः देवरूखात कुणबी महोत्सव
सकाळ वृत्तसेवा
देवरूख, ता. १६ ः ग्रामीण भागातील नागरिकच खऱ्या अर्थाने समाजात सकारात्मक परिवर्तन घडवू शकतात. शेतकऱ्यांनी आता व्यावसायिक शेतीकडे वळणे काळाची गरज आहे. यासाठी लागणारी सर्व मदत आणि शासकीय योजनांचा लाभ मिळवून देण्यासाठी कृषी विभाग सदैव तत्पर राहील, असा विश्वास तालुका कृषी अधिकारी विनोद हेगडे यांनी व्यक्त केला.
रत्नागिरी जिल्ह्यातील ग्रामीण भागात सुहास खंडागळे व उदय गोताड यांच्या संकल्पनेतून आयोजित पहिल्या ‘कुणबी महोत्सवात’ ते बोलत होते. या वेळी गावकर राजेश गोताड, बुधाजी खंडागळे, ढवळ गुरूजी, युयुत्सू आर्ते, कृषितज्‍ज्ञ राहुल यादव, डॉ. मंगेश कांगणे आदी उपस्थित होते. या महोत्सवाचे खास वैशिष्ट्य म्हणजे केवळ उत्सव साजरा न करता ग्रामीण भागातील शेतकऱ्यांसाठी ‘व्यावसायिक शेती’ या विषयावर विशेष मार्गदर्शन सत्राचे आयोजन करण्यात आले होते. हेगडे यांनी शासनाच्या विविध कृषी योजनांची सविस्तर माहिती दिली. सोहळ्यात मान्यवरांच्या हस्ते वसंत मेस्त्री, जगन्नाथ दुदम, निखिल सकपाळ, तुषार गमरे, संदीप सावंत, रमेश मेस्त्री, प्रदीप चंदरकर, संगमरत्न फाउंडेशन, सूरज धावडे यांना मानाचा ‘रत्नागिरी भूषण’ पुरस्कार देऊन सन्मानित करण्यात आले.