11058
सुभाष गोवेकर यांचा
मुंबई येथे सत्कार
सावंतवाडी, ता. १६ ः स्वतंत्र कोकणराज्य अभियान या संघटनेतर्फे येथील निवृत्त प्राध्यापक तथा सामाजिक कार्यकर्ते प्रा. सुभाष गोवेकर यांना ‘कोकणरत्न पदवी’ या पुरस्काराने गौरविण्यात आले. हा सोहळा नुकताच मुंबई येथील मराठी पत्रकार भवनात झाला.
कार्यक्रमाच्या अध्यक्षस्थानी संघटनेचे संजय कोकरे होते. धनंजय कुवेसकर, राजेंद्र सुर्वे, सुभाष राणे, दिलीप लाड यांची प्रमुख उपस्थिती होती. कोकणातील विविध क्षेत्रांत उल्लेखनीय काम करणाऱ्या मान्यवरांना यावेळी गौरविण्यात आले. निवृत्त प्राध्यापक असलेल्या श्री. गोवेकर यांनी विविध संस्थांवर दीर्घकाळ काम केले. यात ग्राहक संरक्षण चळवळ, पर्यावरण, पायाभूत सुविधांच्या विकासासाठी सक्रिय संघटना, आरोग्य, इंडिया रेडक्रॉस सोसायटी, अहिल्या ट्रस्ट आदींमध्ये त्यांनी केलेले काम उल्लेखनीय ठरले. त्यांच्या या सगळ्या कार्याचा विचार करून हा पुरस्कार देण्यात आला. स्वतंत्र कोकण संस्थेचे संजय कोकरे यांच्या हस्ते त्यांना हा पुरस्कार प्रदान करण्यात आला. यात पदक तसेच मानपत्राचा समावेश होता.