नातू महाविद्यालयात तायक्वांदो स्पर्धा
सकाळ वृत्तसेवा
चिपळूण, ता. २४ ः डॉ. तात्यासाहेब नातू कला आणि वरिष्ठ वाणिज्य महाविद्यालयामध्ये ३ ते ५ जानेवारीदरम्यान मुंबई विद्यापीठ आंतरमहाविद्यालयीन तायक्वांदो स्पर्धेचे आयोजन करण्यात आले आहे.
ही स्पर्धा पुरुष व महिला गटात विभागली असून, ३ व ४ जानेवारी रोजी पुरुष गट व ४ व ५ जानेवारी रोजी महिला या गटात स्पर्धा होणार आहेत. पुरुष व महिला यांच्या वजनानुसार त्यांचे विभाजन करण्यात आले असून, पुरुष गटामध्ये ५४ किलो वजनाखालील, ५४ ते ५८, ५८ ते ६३, ६३ ते ६८, ७४ ते ८०, ८० ते ८७, ८७ किलोपेक्षा जास्त या वजनप्रकारानुसार ३ व ४ जानेवारी रोजी स्पर्धा होतील तसेच महिला गटात ४६ किलो वजनाखालील, ४६ ते ४९, ४९ ते ५३, ५३ ते ५७ किलो, ५७ ते ६२ किलो, ६२ ते ६७ किलो, ६७ ते ७३ किलो, ७३ किलोपेक्षा जास्त वजन असणाऱ्या मुलींच्या स्पर्धा ४ ते ५ जानेवारी रोजी होणार आहेत. पुरुष गटातील मुलांची सकाळी ८ वा. डॉ. तात्यासाहेब नातू महाविद्यालयाच्या मैदानामध्ये कागदपत्रांची तपासणी होईल व ११ वा. स्पर्धा सुरू होईल. तसेच महिला गटातील खेळाडूंची ४ जानेवारी रोजी दुपारी १२ वा. कागदपत्रांची तपासणी होईल. ३ वा. स्पर्धा सुरू होईल तसेच ५ जानेवारी रोजी महिला गटातील शिल्लक खेळाडूंची सकाळी ८ वा. स्पर्धा सुरू असेल. सहभागी खेळाडूंनी आपल्या महाविद्यालयातील प्राचार्यांचे अधिकृत संमतीपत्र, ऑनलाइन पात्रता यादीची दोन प्रती, प्रवेशअर्ज, महाविद्यालयातील विद्यार्थी ओळखपत्र सोबत आणणे आवश्यक असून, संबंधित खेळाडू तसेच क्रीडाशिक्षक यांना ओळखपत्राशिवाय स्पर्धेमध्ये सहभागी होता येणार नाही.
---