कायदेविषयक
दापोलीत शिबिर
दापोली ः राष्ट्रीय ग्राहक दिनाचे औचित्य साधून दापोली न्यायालयात कायदेविषयक मार्गदर्शन शिबिर झाले. शिबिरात अखिल भारतीय ग्राहक पंचायतीच्या दापोली तालुका अध्यक्षा ॲड. मनीषा जोशी यांनी ग्राहक संरक्षण कायदा २०१९ मधील तरतुदी, ग्राहकांचे हक्क व अधिकार याबाबत मार्गदर्शन केले. ग्राहकांची फसवणूक, तक्रार नोंदविण्याची प्रक्रिया, ऑनलाईन खरेदीतील हक्क तसेच सेवा पुरवठ्यातील त्रुटींविरोधात उपलब्ध कायदेशीर उपाय यांची माहिती देत नागरिकांनी आपल्या हक्कांबाबत जागरूक राहावे, असे आवाहन करण्यात आले. सामान्य नागरिकांमध्ये ग्राहक हक्कांविषयी जनजागृती करणे हा या शिबिराचा उद्देश असल्याचे विधी सेवा समिती सदस्य मनोज पवार यांनी स्पष्ट केले. कार्यक्रमाला दापोली न्यायालयाचे न्यायाधीश आर. ए. नेमाडे, पी. एस. वारके, अखिल भारतीय ग्राहक पंचायतीचे कमलेश मुसलोणकर, मनोहर जैन, विधी सेवा समिती सदस्य व पत्रकार मनोज पवार, अ‍ॅड. आदिती भिडे आदी उपस्थित होते.

सारंग विद्यालयात
वार्षिक क्रीडा स्पर्धा
गावतळे ः दापोलीतील सारंग पंचक्रोशी माध्यमिक विद्यालयात दोन दिवस वार्षिक स्पर्धा उत्साहात झाल्या. यामध्ये सांघिक व वैयक्तिक क्रीडा प्रकारांचा समावेश करण्यात आलेला होता. क्रीडा स्पर्धेच्या उद्घाटनाचा कार्यक्रम संस्थेचे अध्यक्ष शांताराम पवार यांच्या हस्ते झाला. या वेळी संस्थेचे सचिव डॉ. सुनील गोरीवले, संस्थेचे सदस्य संतोष पेंढारी, स्वप्निल झिमन, मुख्याध्यापक संतोष हजारे, क्रीडाशिक्षक शशिकांत मेंगाणे आदी उपस्थित होते. त्यात कबड्डी, खो-खो, क्रिकेट, व्हॉलिबॉल, वैयक्तिक प्रकारात धावणे, गोळाफेक, थाळीफेक, लांबउडी, उंचउडी यांचा समावेश होता. पहिल्या दिवशी सांघिक क्रीडा स्पर्धा झाल्या.