१४३७९

देवरूख महाविद्यालयात कार्यशाळा
देवरूख ः देवरूख शिक्षण प्रसारक मंडळाच्या आठल्ये सप्रे पित्रे महाविद्यालयात काकासाहेब सप्रे विज्ञान कनिष्ठ महाविद्यालय, देवरूख येथील विद्यार्थ्यांसाठी मूलभूत विज्ञानातील प्रयोगशाळा कौशल्ये या विषयावर एक दिवसीय कार्यशाळेचे आयोजन करण्यात आले होते. या कार्यशाळेला एकूण ७५ विद्यार्थी उपस्थित होते. कार्यक्रमाच्या उद्‍घाटनाला प्राचार्य डॉ. नरेंद्र तेंडोलकर यांनी विद्यार्थ्यांचे स्वागत करून उच्चशिक्षणातील विविध करिअरच्या संधींबाबत प्रेरणादायी मार्गदर्शन केले. डॉ. प्रताप नाईकवाडे यांनी महाविद्यालयाची वैशिष्ट्ये, उपलब्ध सुविधा आणि शैक्षणिक गुणवत्ता याबाबत सविस्तर सादरीकरण केले. डॉ. सागर संकपाळ यांनी रसायनशास्त्र, भौतिकशास्त्र आणि जीवशास्त्र या मूलभूत विज्ञान शाखांमधील विविध करिअरच्या संधींचे विश्लेषणात्मक पद्धतीने माहिती दिली. प्रयोगशाळा प्रात्यक्षिक सत्रात डॉ. अमित वराळे, डॉ. रणजीत बनसोडे, डॉ. हेमंत चव्हाण व प्रा. प्रशांत जाधव यांनी विद्यार्थ्यांना महत्त्वपूर्ण माहितीसह प्रात्यक्षिके दाखवली.

सोनवडे हायस्कूलमध्ये शिबिर
साखरपा ः दहावीची परीक्षा अवघ्या दोन महिन्यांवर आली आहे. या परीक्षेला बसणाऱ्‍या विद्यार्थ्यांसाठी सोनवडे हायस्कूल येथे एकदिवसीय मार्गदर्शन शिबिर रविवारी सकाळी १० वाजता यादवराव घाग प्रतिष्ठानतर्फे आयोजित केले आहे. या शिबिरात निष्णात शिक्षक तसेच तज्ञ मार्गदर्शकांकडून विद्यार्थ्यांना परीक्षेच्या दृष्टिकोनातून मार्गदर्शन करण्यात येणार आहे. त्याच शिबिरात प्रतिष्ठानकडून प्रश्नोत्तरे पुस्तिकाही देण्यात येणार आहेत. या शिबिराला सोनवडे तसेच वाशी हायस्कूलचे विद्यार्थी उपस्थित रहाणार आहेत.

जिल्हास्तरावर काम वाटप समितीची स्थापना
रत्नागिरी ः बेरोजगारांच्या सहकारी सेवा सोसायट्यांना आर्थिकदृष्ट्या सक्षम करण्याच्या उद्देशाने कौशल्य, रोजगार, उद्योजकता व नावीन्यता विभागाच्या शासननिर्णयान्वये जिल्हास्तरावर कामवाटप समितीची स्थापना करण्यात आली आहे. शासननिर्णयानुसार १० लाख रुपये रक्कमेची कामे विनानिविदा उपलब्ध करून देण्यात येतील. कामवाटप समितीकडे जिल्ह्यातील विविध शासकीय कार्यालयाकडून कंत्राटी कामाकरिता पत्रे प्राप्त झाली आहेत. ज्या सेवा सोसायट्यांना या कार्यालयाचे शिफारस पत्र घेऊन नोंदणी झाल्या आहेत अशा सोसायट्यांना कामाची आवश्यकता असल्यास काम मिळण्याबाबतचे प्रस्ताव ७ जानेवारीला सायंकाळी ५ वाजेपर्यंत कौशल्य विकास, रोजगार व उद्योजकता मार्गदर्शन केंद्र या कार्यालयात स्वहस्ते सादर करावेत. सोबत अटीशर्तींची पूर्तता करणे अनिवार्य आहे. उशिरा प्राप्त झालेली तसेच अपूर्ण स्वरूपातील प्रस्ताव अपात्र ठरवून स्वीकारण्यात येणार नाहीत याची नोंद घ्यावी, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राचे प्रभारी सहाय्यक आयुक्त दुधाळ यांनी केले आहे.

१४४५०
पूर्णगड येथे एचपीव्ही लसीकरण शिबिर
पावस ः रत्नागिरी तालुक्यातील जिल्हा परिषद आदर्श शाळा पूर्णगड नं. १ या शाळेत प्राथमिक आरोग्यकेंद्र पावसअंतर्गत उपकेंद्र पूर्णगड यांच्यामार्फत एचपीव्ही लसीकरण करण्यात आले. आरोग्यसेवक अनिल धोपटे यांनी या लसीकरणाविषयी उत्तम प्रकारे माहिती दिली ‌व जागृती केली. लसीकरणासाठी आरोग्यसेवक धोपटे, आशा पावसकर उपस्थित होते. या वेळी शाळा व्यवस्थापन समिती अध्यक्षा तारये, सदस्य, पालक उपस्थित होते. यासाठी मुख्याध्यापिका भारती तायशेटे, शिक्षक पूर्वा वाकडे, भारती शिंगाडे, राजेंद्र रांगणकर यांनी उत्तम सहकार्य केले. या लसीकरणाविषयी पालकांकडून समाधान व्यक्त करण्यात आले.