विद्यार्थ्यांनी उभारले दोन वनराई बंधारे
आंबतखोलमध्ये उपक्रम ः सावर्डे कला महाविद्यालयाचे श्रमसंस्कार शिबिर
सावर्डे, ता. ३१ ः येथील सह्याद्री शिक्षण संस्थेच्या कला व विज्ञान महाविद्यालयाच्या विद्यार्थ्यांनी ‘समाजसेवा हीच खरी ईश्वरसेवा’ हा मंत्र प्रत्यक्ष कृतीतून साकार केला. राष्ट्रीय सेवा योजना व श्रमसंस्कार शिबिराअंतर्गत आंबतखोल येथे विद्यार्थ्यांनी कोणतेही यंत्र न वापरता दगड व मातीच्या साह्याने दोन वनराई बंधारे उभारले. या उपक्रमामुळे परिसरातील पाणीपातळी वाढण्यास व जनावरांच्या पाण्याची सोय होण्यास मदत होणार आहे.
शिबिरात स्वच्छ भारत अभियानांतर्गत ग्रामदैवत, ग्रामपंचायत परिसर स्वच्छता, रस्ते दुरुस्ती, मैदान सपाटीकरण तसेच स्वच्छता, लसीकरण व प्लास्टिकमुक्तीबाबत जनजागृती करण्यात आली. आरोग्य तपासणी शिबिरात रक्तदाब व मधुमेह तपासणी झाली. विविध व्याख्यानांतून विद्यार्थ्यांचे प्रबोधन करण्यात आले. या शिबिराने तरुणाई समाजबदलासाठी सज्‍ज असल्याचे सिद्ध केले आहे.
महाविद्यालयाच्या युवक-युवतींनी घरोघरी जाऊन ग्रामस्थांना स्वच्छतेचे महत्त्व, लसीकरण आणि प्लास्टिक मुक्ती बाबत जनजागृती केली. आरोग्य तपासणी शिबिराच्या माध्यमातून ग्रामस्थ, महिला, विद्यार्थी, शिक्षक व शिक्षकेतर कर्मचारी यांची रक्तदाब तपासणी व मधुमेह तपासणी करण्यात आली. शिबिराला उपसरपंच प्रभाकर गुजर, तंटामुक्ती समिती अध्यक्ष अरुण जाधव, ग्रामसेवक शशिकांत कुलकर्णी, मुख्याध्यापक अमर भाट, संतोष साठले आदींनी भेट देऊन मार्गदर्शन केले. शिबिर यशस्वीपणे पार पाडण्यासाठी प्रा. अवनी कदम, प्रा. दीप्ती शेंबेकर, प्रा. पूजा आवळे, प्रा. जयसिंग चवरे व रमेश कातुर्डे यांनी विशेष परिश्रम घेतले.