सावंतवाडी येथे आजपासून
पोलिस स्थापना दिन सप्ताह
सकाळ वृत्तसेवा
सावंतवाडी, ता. १ : महाराष्ट्र पोलिस स्थापना दिनाचे औचित्य साधून येथील पोलिस ठाण्याच्या वतीने २ ते ८ जानेवारी या कालावधीत ''पोलिस स्थापना दिन सप्ताह'' साजरा करण्यात येणार आहे. जिल्हा पोलिस अधीक्षक, अपर पोलिस अधीक्षक व उपविभागीय पोलिस अधिकारी यांच्या मार्गदर्शनाखाली यानिमित्त विद्यार्थी आणि नागरिकांसाठी विविध प्रबोधनात्मक व सामाजिक उपक्रमांचे आयोजन करण्यात आले असल्याची माहिती पोलिस निरिक्षक अमोल चव्हाण यांनी दिली. ​या सप्ताहाची सुरुवात उद्या (ता. २) सकाळी १० वाजता आरपीडी हायस्कूल येथे निबंध स्पर्धेने होईल. याच दिवशी मळगाव हायस्कूल येथे पोलिस कामकाज, सायबर क्राईम आणि शस्‍त्रास्‍त्रांचे प्रदर्शन भरवले जाणार आहे. तसेच ३ जानेवारीला सकाळी ९ ते दुपारी २ या वेळेत जगन्नाथराव भोसले उद्यान येथे सायबर विभाग, बॉम्ब शोधक व नाशक पथक, भरोसा सेल, वाहतूक शाखा आणि पोलिस वाद्यवृंद पथकाचे माहितीपर स्टॉल्स उभारले जातील. ​क्रीडा आणि आरोग्याच्या दृष्टीने ४ रोजी सायंकाळी ४ वाजता पोलिस ठाणे मैदानावर पोलिस, पत्रकार व शासकीय विभागांची व्हॉलीबॉल स्पर्धा, ५ ला सकाळी ६.३० वाजता मोती तलाव परिसरात ''मॉर्निंग वॉक'' कार्यक्रम, ६ ला सायंकाळी ५ वाजता पोलिस ठाणे आवारात ज्येष्ठ नागरिक मेळावा व महिलांसाठी मनोरंजनात्मक खेळ, ​सप्ताहाच्या सांगता टप्प्यात ७ ला पोलिस ठाण्याच्या सभागृहात रोटरी क्लब व अन्य संस्थांच्या सहकार्याने भव्य रक्तदान शिबिर होईल. या सप्ताहात तालुक्यातील सर्व नागरिक, विद्यार्थी आणि सामाजिक संघटनांनी मोठ्या संख्येने सहभागी व्हावे, असे आवाहन सावंतवाडी पोलिस ठाण्यातर्फे करण्यात आले आहे.