वाशिष्ठी कृषी महोत्सवात ‘कॅट अन् डॉग शो’
चिपळुणात होणार स्पर्धा ; विजेत्या प्राणीमालकांना मिळणार पारितोषक
सकाळ वृत्तसेवा
चिपळूण, ता. २ : वाशिष्ठी डेअरी प्रकल्पातर्फे आयोजित केलेल्या वाशिष्ठी कृषी व पशुधन प्रदर्शन कृषी महोत्सवात यंदा प्राणीमित्र आणि पाळीव प्राण्यांसाठी खास आकर्षण ठरणाऱ्या ‘कॅट शो’ आणि ‘डॉग शो’चे आयोजन केले आहे. ७ रोजी कॅट शो तर ८ रोजी डॉग शो होणार आहे. या स्पर्धेमुळे कृषी महोत्सवाला रंगत येणार आहे. स्पर्धेतील विजेत्या प्राणीमालकांना आकर्षक बक्षिसे दिली जातील, असे अध्यक्ष प्रशांत यादव आणि मुख्य प्रवर्तक स्वप्ना यादव यांनी सांगितले.
नववर्षाच्या पहिल्या आठवड्यात सलग तिसऱ्या वर्षी हा महोत्सव आयोजित केला आहे. ५ ते ९ या कालावधीत चिपळूणमधील बहादूरशेख नाका येथील स्वातंत्र्यवीर सावरकर मैदानात हा महोत्सव होईल. गतवर्षी आयोजित केलेल्या कॅट शो व डॉग शो ला प्रचंड प्रतिसाद मिळाला होता. त्यामुळे यंदा प्राणीमित्र आणि पाळीव प्राण्यांचा जल्लोष पाहण्याची संधी रसिकांना मिळणार आहे. स्पर्धेत सहभाग घेणाऱ्या प्राण्यांचे वय किमान अडीच महिने असणे आवश्यक आहे. त्यांची सुरक्षितता व देखभाल ही संबंधित मालकांची जबाबदारी राहील, असे आयोजकांनी सांगितले.
कृषी महोत्सवात विविध स्पर्धा, प्रदर्शने, खाद्यपदार्थांची रेलचेल, तंत्रज्ञान व मनोरंजन यांचे नियोजन केले आहे. हा महोत्सव शेतकरी, पशुपालक व नागरिकांसाठी ज्ञान व आनंदाची पर्वणी ठरेल, असा विश्वास यादव यांनी व्यक्त केला.
------
चौकट
पाळीव प्राण्यांना मोफत लसीकरण
मोफत रेबीज लसीकरणावेळी वाशिष्ठी कृषी महोत्सवाच्या निमित्ताने जिल्हा पशुवैद्यकीय सर्वचिकित्सालय विभागाच्यावतीने श्वान व मांजरीसाठी मोफत रेबीज प्रतिबंधक लसीकरण करण्यात येणार आहे. या उपक्रमाचा लाभ पशुपालकांनी घ्यावा, असे आवाहन पशुसंवर्धन विभागाचे सहाय्यक आयुक्त दत्तात्रय सोनवणे यांनी केले आहे.