सावंतवाडीच्या रुग्णालयप्रश्नी
अहवालावर कार्यवाही नाही

सकाळ वृत्तसेवा
सावंतवाडी, ता. ३ ः येथील उपजिल्हा रुग्णालयाच्या संदर्भात कोल्हापूर सर्किट बेंच समिती आणि आरोग्य विभागाच्या सचिवांनी केलेल्या पाहणीनंतर सादर झालेल्या अहवालावर अद्याप कोणतीही ठोस कार्यवाही झालेली नाही. अहवालातील शिफारशींबाबत अद्याप कोणतीही भूमिका घेण्यात आलेली नाही, अशी माहिती आरोग्य उपसंचालकांनी पत्राद्वारे दिली.
​अभिनव फाउंडेशन, सिंधुदुर्ग यांनी पत्राद्वारे या अहवालाबाबत शासन स्तरावर काय कार्यवाही झाली, याची विचारणा आरोग्य सेवा कोल्हापूर मंडळाचे उपसंचालक डॉ. माने यांच्याकडे केली होती. त्यावर उत्तर देताना डॉ. माने यांनी, सक्षम प्राधिकरणाच्या मान्यतेनंतरच अहवालातील शिफारशींचा विचार करून आवश्यक कार्यवाही करण्यात येईल, असे स्पष्ट केले. ​यामुळे रुग्णालयाच्या सुधारणेबाबत प्रशासकीय पातळीवर अद्याप कोणताही निर्णय झाला नसल्याचे स्पष्ट झाले आहे. उच्च न्यायालयात याचिका प्रलंबित असतानाही या प्रक्रियेत होत असलेल्या दिरंगाईबद्दल प्रश्नचिन्ह उपस्थित केले जात असून, ‘सक्षम प्राधिकरण’ म्हणजे नेमके कोण? आणि ही मान्यता कधी मिळणार?, असा प्रश्‍न अभिनव फाउंडेशनने केला आहे.