15503

पोलिसांचे कामकाज समजून घ्या

श्रद्धा भोसले ः सावंतवाडीत पोलिस स्थापना दिन

सकाळ वृत्तसेवा
सावंतवाडी, ता. ४ ः पोलिस दल हे २४ तास जनतेच्या सुरक्षेसाठी व सेवेसाठी तत्पर असते. पोलिस स्थापना दिनाच्या निमित्ताने आयोजित या प्रदर्शनातून विद्यार्थ्यांनी शस्त्रास्त्रे तसेच पोलिस दलाच्या कार्यपद्धतीची माहिती अभ्यासपूर्ण दृष्टीने घ्यावी आणि भविष्यात देशसेवेसाठी स्वतःला तयार ठेवावे, असे आवाहन सावंतवाडीच्या नगराध्यक्षा सौ. श्रद्धा सावंत-भोसले यांनी केले.
महाराष्ट्र पोलिस दलातर्फे २ ते ८ जानेवारी या कालावधीत ‘पोलिस स्थापना दिन सप्ताह’ साजरा करण्यात येत असून, त्यानिमित्त येथील जनरल जगन्नाथराव भोसले उद्यानात पोलिस दलातील विविध विभागांच्या कामकाजाची माहिती देणारे विशेष प्रदर्शन आयोजित केले आहे. या प्रदर्शनाचे उद्‍घाटन नगराध्यक्षा श्रद्धा सावंत-भोसले यांच्या हस्ते झाले.
नागरिक व विद्यार्थ्यांना पोलिस दलाच्या कार्यपद्धतीची सविस्तर माहिती व्हावी, यासाठी या ठिकाणी विविध माहितीपूर्ण स्टॉल्स उभारले आहेत. सायबर सेलच्या माध्यमातून वाढत्या सायबर गुन्ह्यांपासून बचावाबाबत मार्गदर्शन करण्यात येत आहे. बॉम्ब शोध व नाशक पथक (BDDS) कडून स्फोटकांचा शोध घेण्यासाठी वापरण्यात येणारी उपकरणे व कार्यपद्धतीची माहिती दिली. भरोसा सेल व वाहतूक विभागाच्या स्टॉलवर महिला व बालकांच्या सुरक्षिततेसह वाहतूक नियमांविषयी जनजागृती करण्यात येत आहे. तसेच पोलिस वाद्यवृंद (बँड पथक) यांचे सादरीकरणही उपस्थितांचे लक्ष वेधून घेत आहे. उद्‍घाटनप्रसंगी युवराज लखमराजे भोसले, सहाय्यक पोलिस निरीक्षक पंकज शिंदे, श्री. लोहकरे यांच्यासह पोलिस अधिकारी, कर्मचारी, नागरिक आणि मोठ्या संख्येने विद्यार्थी उपस्थित होते. शालेय विद्यार्थ्यांचा या उपक्रमाला उत्स्फूर्त प्रतिसाद लाभला.