चिपळुणात आजपासून वाशिष्ठी कृषी महोत्सव
नऊ जानेवारीपर्यंत भरगच्च कार्यक्रम ; अवधूत गुप्ते, अशोक हांडेंची मैफल रंगणार
सकाळ वृत्तसेवा
चिपळूण, ता. ४ ः चिपळूणमधील वाशिष्ठी कृषी महोत्सवात यंदाही नवचैतन्य, नवी ऊर्जा आणि अस्सल मराठी संस्कृतीचा सुगंध दरवळणार आहे. ५ ते ९ जानेवारी या कालावधीत संगीत, भक्ती, शौर्य, निष्ठा आणि मनोरंजन यांचा हृदयाला भिडणारा संगम रसिकांना दररोज रात्री अनुभवता येणार आहे.
वाशिष्ठी डेअरीच्या वतीने आयोजित वाशिष्ठी कृषी महोत्सव यंदा अधिक भव्य, अधिक भावस्पर्शी आणि अधिक प्रेरणादायी स्वरूपात साजरा होणार आहे. ५ जानेवारीला सायंकाळी ५ वाजता विघ्नहर्ता ढोलपथक, मुकुंद गुरव तुतारी वादक आणि छत्रपती शिवाजी पेठ कोल्हापूर येथील गणेश कदम यांचा पारंपारिक वाद्यांचा गजर, तुतारीचा नाद आणि मर्दानी खेळांची रोमांचक अनुभूती देणारा ‘पारंपरिक वाद्य व स्वराज्य रक्षक शिवबाचा मावळा’ हा एकत्रित कार्यक्रम रंगणार आहे. ६ जानेवारीला सायंकाळी ५ वाजता जनावरांच्या विविध गुणदर्शनाचा कार्यक्रम होईल. सायंकाळी ६ वाजता हरिपाठ रंगणार आहे. रात्री ८ वाजता कृष्णाई इव्हेंट प्रस्तुत ‘वारी’ हा भक्तिरसाने ओथंबलेला कार्यक्रम रसिकांच्या मनात श्रद्धेचा दीप प्रज्वलित करणार आहे. ७ जानेवारीला सायंकाळी ५ वाजता मांजरप्रेमींसाठी आकर्षण ठरलेल्या कॅट शोचे आयोजन केले आहे. सायंकाळी ६ वाजता कीर्तन आयोजित केले आहे. रात्री ८ वा. कृष्णाई इव्हेंट प्रस्तुत ‘मावळा – स्वराज्याचे शिलेदार’ हा कार्यक्रम होणार आहे. ८ जानेवारीला सायंकाळी ५ वाजता डॉग शो होणार असून सायंकाळी ६ वाजता भजनात तल्लीन होण्याची संधी रसिकांना मिळणार आहे. रात्री ८ वाजता महाराष्ट्रातील लोकप्रिय गायक अवधूत गुप्ते यांच्या बहारदार सुरांनी महोत्सवाचा परिसर दुमदुमून जाणार आहे.

चौकट
‘आवारा हूँ’ लाईव्ह शो
महोत्सवाचा समारोप ९ जानेवारीला रात्री आठ वाजता, प्रसिद्ध संगीतकार अशोक हांडे यांच्या ‘आवारा हूँ’ या लाईव्ह शोद्वारे होणार आहे. जास्तीत जास्त रसिकांनी या अविस्मरणीय सांस्कृतिक पर्वाचा लाभ घ्यावा, असे आवाहन वाशिष्ठी डेअरीचे चेअरमन प्रशांत यादव आणि मुख्य प्रवर्तक स्वप्ना प्रशांत यादव यांनी केले आहे.