आजच्या काळात महिलांनी सबल व्हावे
श्रद्धा कळंबटे ः देव, घैसास, कीर महाविद्यालयात बालिकादिन
सकाळ वृत्तसेवा
रत्नागिरी, ता. ५ : आजच्या काळात महिलांनी सबल व्हायला हवे यासाठी चांगली वागणूक व विचार आत्मसात केले पाहिजेत, असे प्रतिपादन सामाजिक कार्यकर्त्या श्रद्धा कळंबटे यांनी केले. देव, घैसास, कीर कला, वाणिज्य आणि विज्ञान वरिष्ठ महाविद्यालयात बालिकादिन कार्यक्रमात त्या बोलत होत्या.
महाविद्यालयाच्या महिला विकास कक्ष, इतिहास विभाग व आयक्युएसी यांच्या संयुक्त विद्यमाने क्रांतिज्योती सावित्रीबाई फुले जयंतीनिमित्त बालिका दिन साजरा करण्यात आला. कळंबटे यांनी सावित्रीबाई फुले यांच्या प्रतिमेला पुष्पहार अर्पण केला. प्रास्ताविक महिला विकास कक्षप्रमुख प्रा. आसावरी मयेकर यांनी केले. विद्यार्थ्यांनीदेखील या दिनानिमित्त मनोगत व्यक्त केले.
महाविद्यालयाच्या प्र. प्राचार्या मधुरा पाटील यांनी अध्यक्षीय मनोगत व्यक्त करत विद्यार्थ्यांना बालिकादिनाच्या शुभेच्छा दिल्या. कार्यक्रमाला उपप्राचार्या वसुंधरा जाधव, प्रा. राखी साळगावकर, प्रा. वैभव घाणेकर उपस्थित होते. महिला विकास कक्षप्रमुख प्रा. आसावरी मयेकर, प्रथम व द्वितीय वर्षाचे विद्यार्थी उपस्थित होते. साक्षी शितप व तन्वी पटवर्धन या विद्यार्थिनींनी सूत्रसंचालन केले. प्रा. रिया बंडबे यांनी आभार मानले.