संगमेश्वरमध्ये महाआघाडीची शक्यता
राष्ट्रवादीचा पुढाकार ; सात जिल्हा परिषद गट
सकाळ वृत्तसेवा
संगमेश्वर, ता. १६ ः जिल्हा परिषद आणि पंचायत समिती निवडणूक संगमेश्वर तालुक्यात महाआघाडीद्वारेच लढवण्याच्या हालचाली सुरू झालेल्या आहेत. त्या दृष्टीने राष्ट्रवादी काँग्रेस (शरदचंद्र पवार) पक्षाकडून पावले उचलण्यात आली आहेत.
तालुक्यातील एकूण ७ जिल्हा परिषद गट आणि १४ पंचायत समिती गणांपैकी राष्ट्रवादी काँग्रेसने (शरद पवार गट) आपल्या वाट्याला किमान एक जिल्हा परिषद गट आणि तीन ते चार पंचायत समिती गण मिळावेत, अशी मागणी केली आहे. यामध्ये विशेषतः या जागांवर पक्षाने आपला दावा ठोकला आहे. या संदर्भात माहिती देताना राष्ट्रवादी काँग्रेसचे जिल्हाध्यक्ष बारक्याशेठ बने यांनी दुजोरा दिला आहे. तालुक्यात ठाकरे गटाची ताकद मोठी आहेच; पण आता मनसे आणि वंचित बहुजन आघाडीला सोबत घेऊन आम्ही ताकदीने मैदानात उतरणार आहोत. पंचायत समितीवर महाआघाडीचा झेंडा फडकवण्यात आम्ही नक्कीच यशस्वी होऊ, असा विश्वास बने यांनी व्यक्त केला आहे. जे कार्यकर्ते सामाजिक कामात अग्रेसर आहेत आणि ज्यांचा जनसंपर्क दांडगा आहे अशाच लोकांना उमेदवारी मिळावी यासाठी आम्ही आग्रही आहोत. महाआघाडीच्या माध्यमातून निवडणूक लढवून आम्ही विरोधकांना तगडे आव्हान देऊ, असे बने यांनी स्पष्ट केले.
दरम्यान, संगमेश्वर तालुक्यात या राजकीय समीकरणामुळे आगामी निवडणुका चुरशीच्या होण्याची शक्यता वर्तवली जात आहे. उबाठा, मनसे आणि वंचित यावर काय भूमिका घेतात, याकडे सर्वांचे लक्ष लागले आहे.