मसुरे येथे २१ पासून
माघी गणेश जयंती
मसुरे, ता. १६ : मसुरे-मार्गाचीतड येथील श्री महागणपती मंदिरात श्री महागणपती विश्वस्त मंडळाच्यावतीने २१ व २२ ला माघी श्री गणेश जयंती उत्सव विविध धार्मिक कार्यक्रमांनी साजरा करण्यात येणार आहे. २१ ला सकाळी ८.३० ते ९ या वेळेत सहस्रनाम जप, सकाळी ९.३० ते दुपारी १२ या वेळेत सामुदायिक एकादशी सोहळा आयोजित केला आहे.
दुपारी १२.३० नंतर महाआरती व तीर्थप्रसाद होणार आहे. सायंकाळी ६.३० ते ९ या वेळेत हरिपाठ कार्यक्रमांतर्गत ६.३० ते ७.३० हरिपाठ, ७.३० ते ८.३० ‘मन हे मोगरा अर्पुणी ईश्वरा’ या ओवीवर आधारित ह.भ.प. जगन्नाथ रामचंद्र मोहिते यांचे प्रवचन व ८.३० ते ९ या वेळेत वारकरी दिंडी होणार आहे. २२ ला सकाळी ८ ते ९ श्री महागणपती पूजा व अभिषेक, ९ ते दुपारी १२.३० श्री सत्यनारायण महापूजा, १२.३० ते १ महाआरती व तीर्थप्रसाद, १ ते ३ महाप्रसाद, ३ ते सायंकाळी ५ हळदी-कुंकू समारंभ होईल. सायंकाळी ७ वाजता श्री महागणपती प्रासादिक भजन मंडळ, मसुरे-मार्गाचीतड यांचे भजन (बुवा अमित बागवे) होणार आहे. रात्री ९.३० वाजता बाळा सावंत दशावतार नाट्यमंडळ, नेरूर-असरोडी यांचा मिनी ट्रिक्सीनयुक्त आध्यात्मिक दशावतार नाट्यप्रयोग ‘श्री देव सत्यनारायण’ सादर होणार आहे. दरम्यान, एकादशी करण्याची इच्छा असलेल्या भाविकांनी संपर्क साधावा, असे आवाहन विश्वस्त मंडळाने केले आहे.