वेतन रोखलेल्या शिक्षकांचे
शिक्षण विभागातच ठाण

सकाळ वृत्तसेवा
सिंधुदुर्गनगरी, ता. १६ ः सावंतवाडी व दोडामार्ग तालुक्यातील नऊ माध्यमिक शाळांमधील सुमारे २० शिक्षकांनी वेतन रोखल्याने माध्यमिक शिक्षण विभागात धडक दिली. त्यांनी कार्यालयात ठाण मांडून आंदोलन केले. माध्यमिक शिक्षणाधिकारी, आपल्या कार्यालयात उपस्थित नसल्याने शिक्षकांनी वेतन पथक विभागात जाऊन जाब विचारला.
वेतन पथक अधीक्षकांकडून, माध्यमिक शिक्षणाधिकारी यांनी ७ जानेवारीला वेतन आदा करू नये, असे पत्र दिल्याने वेतन काढण्यात आले नसल्याची माहिती शिक्षकांना दिली. यावर आंदोलनकर्त्या शिक्षकांनी तीव्र नाराजी व्यक्त केली. शिक्षण उपसंचालक यांनी ८ जानेवारीला माध्यमिक शिक्षणाधिकारी यांना वेतन थांबविण्याचा अधिकार नसल्याचे स्पष्ट करणारे पत्र दिले असल्याचे शिक्षकांनी सांगितले. असे असतानाही वेतन का रोखण्यात आले? असा प्रश्न उपस्थित करत त्यांनी संताप व्यक्त केला. जोपर्यंत वेतन आदा होत नाही, तोपर्यंत कार्यालय न सोडण्याचा निर्धार शिक्षकांनी व्यक्त करत कार्यालयातच ठाण मांडले. दरम्यान, याबाबत माध्यमिक शिक्षण विभागाशी संपर्क साधला असता, उपसंचालक शिक्षण यांच्याकडे मार्गदर्शन मागविण्यात आले असून त्यांच्या सूचनेनुसार पुढील कार्यवाही करण्यात येईल, असे सांगण्यात आले.