देवगडमध्ये अद्याप एकही
उमेदवारी अर्ज दाखल नाही

सकाळ वृत्तसेवा
देवगड, ता. १९ ः तालुक्यातील जिल्हा परिषद व पंचायत समिती सार्वत्रिक निवडणुकीतील उमेदवारी अर्ज दाखल करण्याच्या आजच्या तिसऱ्या दिवशी देखील एकही उमेदवारी अर्ज दाखल झाला नाही. आज केवळ संभाव्य उमेदवारांनी एकूण २६ उमेदवारी अर्ज घेतले. पहिल्या दोन दिवसांचे मिळून १६ उमेदवारी अर्ज घेतले होते. त्यामुळे तीन दिवसांत एकूण ४२ उमेदवारी अर्ज घेतले आहेत; मात्र त्यातील एकही अर्ज दाखल केलेला नसल्याची माहिती निवडणूक यंत्रणकेडून देण्यात आली.
तालुक्यातील जिल्हा परिषद, पंचायत समिती सार्वत्रिक निवडणुकीसाठी शुक्रवारपासून (ता. १६) उमेदवारी अर्ज भरण्यास प्रारंभ झाला. बुधवारपर्यंत (ता.२१) उमेदवारी अर्ज दाखल करावयाचे आहेत. आलेल्या अर्जांची गुरुवारी (ता.२२) छाननी होणार आहे, तर २७ ला उमेदवारी अर्ज मागे घेण्याची अंतिम मुदत आहे. उमेदवारी अर्ज दाखल करण्याच्या पहिल्या तीन दिवसांमध्ये एकही अर्ज भरलेला नाही. आज संभाव्य इच्छुक उमेदवारांनी एकूण २६ उमेदवारी अर्ज घेतले असून त्यातील एकही अर्ज आज कार्यालयात प्राप्त नाही. आज पंचायत समितीसाठी १४ तर जिल्हा परिषदेसाठी १२ उमेदवारी अर्ज घेण्यात आले असल्याची माहिती निवडणूक यंत्रणेकडून देण्यात आली. आतापर्यंत पंचायत समितीसाठी २१ आणि जिल्हा परिषदेसाठी २१ असे ४२ उमेदवारी अर्ज घेण्यात आले आहेत. निवडणूक निर्णय अधिकारी म्हणून उपजिल्हाधिकारी नितीन राऊत काम पाहत आहेत. त्यांना तहसीलदार रमेश पवार सहाय्य करीत आहेत.