अवजड वाहतूक बंद करा;
अन्यथा सोमवारी आंदोलन

बांदावासीयांचा प्रशासनास इशारा

सकाळ वृत्तसेवा
बांदा, ता. २० ः बांदा-दाणोली रस्त्यावरील अवजड वाहतुकीमुळे नागरिकांच्या जीवितास धोका निर्माण झाला आहे. याबाबत वारंवार निवेदन देऊनही कारवाई न झाल्याने सोमवारी (ता. २६) प्रजासत्ताकदिनी उपोषणास बसणार असल्याचा इशारा येथील ग्रामस्थांनी दिला. याबाबत शहरातील निमजगा, गवळीटेंब, शेटकरवाडी, गडगेवाडी, चर्मकारवाडी (बांदेकरवाडी) येथील ग्रामस्थांनी जिल्हाधिकाऱ्यांना निवेदन दिले.
निवेदनात म्हटले आहे, की निमजगा, गवळीटेंब शेटकरवाडी, गडगेवाडी, चर्मकारवाडी (बांदेकरवाडी) ग्रामस्थांच्यावतीने यापूर्वी २ जानेवारी ते ९ जानेवारी दरम्यान स्मरणपत्र संबंधित खात्याकडे दिले होते. यामध्ये अवजड वाहतुकीमुळे होणारे अपघात, सार्वजनिक मालमत्तेचे नुकसान व नागरिकांच्या जीवितास निर्माण झालेल्या गंभीर व धोकादायक स्थितीकडे निवेदनाद्वारे लक्ष वेधत तातडीची कारवाई करून अवजड वाहतूक बंद करण्याबाबत आदेश देण्याची विनंती केली होती. मात्र, आजपर्यंत कोणतीही ठोस कार्यवाही झालेली नाही. त्यामुळे महिला, विद्यार्थी व नागरिकांचे जीवन धोक्यात आहे. यासंदर्भात तातडीने कार्यवाही करावी, अन्यथा २६ जानेवारीला जिल्हाधिकारी कार्यालय ओरोस येथे बेमुदत उपोषणास बसण्याचा इशारा दिला आहे.