कोतवडेत दारूविक्रीवर
पोलिसांचा छापा
रत्नागिरी ः तालुक्यातील कोतवडे येथे पोलिसांनी गावठी हातभट्टी दारूविक्रीवर कारवाई केली. या कारवाईत ५०० रुपयांची ५ लिटर दारू जप्त केली आहे. ग्रामीण पोलिसात संशयिताविरूद्ध गुन्हा दाखल केला आहे. प्रदीप धर्मराज वारेकर (वय ५३, रा. कोतवडे, सनगरेवाडी, रत्नागिरी) असे संशयिताचे नाव आहे. ही घटना सोमवारी (ता. १९) सायंकाळी सातच्या सुमारास निदर्शनास आली. पोलिसांकडून मिळालेल्या माहितीनुसार, संशयित वारेकर हे विनापरवाना गावठी हातभट्टीची दारूविक्रीसाठी ठेवलेल्या स्थितीत सापडले. त्यांच्याकडून ५०० रुपयांची पाच लिटर दारू पोलिसांनी जप्त केली. या प्रकरणी पोलिस कॉन्स्टेबल मंदार कोळंबेकर यांनी ग्रामीण पोलिसात तक्रार दिली.
-------------
विषारी द्रव्य प्यायलेल्या
प्रौढ व्यक्तीचा मृत्यू
रत्नागिरी ः दिवटेवाडी (ता. राजापूर) येथील प्रौढाला चक्कर येऊन बेशुद्ध पडला. त्यांना उपचारासाठी राजापूर ग्रामीण रुग्णालयात दाखल केले. अधिक उपचारासाठी जिल्हा शासकीय रुग्णालयात अतिदक्षता विभागात उपचार सुरू असताना उपचारादरम्यान तेथील वैद्यकीय अधिकाऱ्यांनी त्यास तपासून मृत घोषित केले. अजित वसंत शिंदे (वय ४५, दिवटेवाडी, ता. राजापूर) असे मृत प्रौढाचे नाव आहे. ही घटना रविवारी (ता. १८) सकाळी पावणेसहाच्या सुमारास जिल्हा शासकीय रुग्णालयात घडली. पोलिसांकडून मिळालेल्या माहितीनुसार, अजित शिंदे यांना चक्कर येऊन बेशुद्ध पडले. त्यांचा भाऊ संजय शिंदे यांनी त्यांना उपचारासाठी राजापूर ग्रामीण रुग्णालयात दाखल केले. अधिक उपचारासाठी त्यांनी जिल्हा रुग्णालयातील अतिदक्षता विभागात दाखल केले असता त्यांना उलटी झाली. त्याला उग्र वास आला म्हणून संजय शिंदे यांनी घरी कळवले असता त्यांच्या पत्नीला विषारी औषधाची बाटली सापडली. रिकामी बाटली डॉक्टरांनी दाखवली असता त्यावरून डॉक्टरांनी उपचार सुरू केले. उपचार सुरू असताना रविवारी त्यांचा मृत्यू झाला.