मच्छीमार बांधवांसाठी उद्या
मोफत विशेष आरोग्य शिबिर
रत्नागिरी, ता. २१ : महाराष्ट्र शासनाचा सार्वजनिक आरोग्य विभाग आणि राष्ट्रीय आरोग्य अभियान, जिल्हा रुग्णालयाच्या विद्यमाने शुक्रवारी (ता. २३) मिरकरवाडा येथील मच्छीमार बांधवांसाठी विशेष बाह्य संपर्क आरोग्य शिबिराचे आयोजन करण्यात आले आहे. मच्छीमार बांधवांना त्यांच्या कामाच्या ठिकाणीच पुरेशा आरोग्यसेवा उपलब्ध व्हाव्यात, या उद्देशाने हे मोफत तपासणी शिबिर राबवले जात आहे.
मिरकरवाडा येथील उर्दू शाळा क्र. १० मध्ये सकाळी १० ते दुपारी ४ या वेळेत हे शिबिर होणार आहे. या शिबिरामध्ये नागरिकांची रक्तदाब, मधुमेह आणि रक्ताची सविस्तर तपासणी केली जाईल. नेत्ररोग, दंतचिकित्सा आणि त्वचारोगावर तज्ज्ञ डॉक्टरांकडून उपचार दिले जातील. महिलांची स्वतंत्र आरोग्य तपासणी, मानसिक आरोग्य तपासणी आणि आरोग्य व स्वच्छतेबाबत विशेष समुपदेशनही करण्यात येणार आहे. समाजातील वाढत्या व्यसनाधिनतेवर उपाय म्हणून व्यसनमुक्ती आणि कर्करोग जनजागृतीवरही या शिबिरात भर दिला जाणार आहे.