रत्नागिरीत १० जागांसाठी ८९ अर्ज दाखल
गट, गण निवडणूक ; २७ पर्यंत अर्ज माघारीची मुदत
सकाळ वृत्तसेवा
रत्नागिरी, ता. २२ : जिल्हा परिषद व पंचायत समितीच्या सार्वत्रिक निवडणुकीसाठी अर्ज भरण्याच्या आज शेवटच्या दिवशी उमेदवारांची मोठी गर्दी झाली. माजी समाजकल्याण सभापती परशुराम कदम यांचा ऐनवेळी शिवसेनेकडून पत्ता कट झाल्याने त्यांनी हातखंबा गटातून अपक्ष उमेदवारी अर्ज दाखल केला आहे. रत्नागिरी तालुक्यातील २० पंचायत समिती गणासाठी ५१ अर्ज तर जिल्हा परिषदेच्या १० गटांसाठी ३८ अर्ज दाखल झाले आहेत.
रत्नागिरी तालुक्यातील पंचायत समिती व जिल्हा परिषदेची शेवटची यादी रात्री जाहीर करण्यात आली. हातखंबा जिल्हा परिषद गटामधून इच्छुक असलेले माजी जिल्हा परिषद समाजकल्याण सभापती परशुराम कदम यांना ऐनवेळी उमेदवारी डावलण्यात आली. पालकमंत्री उदय सामंत यांचे स्वीय सहाय्यक नेताजी पाटील यांनी शिवसेनेमधून गोळप पंचायत समिती गणासाठी अर्ज दाखल केला. रत्नागिरी तालुक्यातील जिल्हा परिषदेच्या १० गटांमध्ये ३८ उमेदवारांनी अर्ज दाखल केले आहेत तर पंचायत समितीच्या २० गणांसाठी ५१ उमेदवारांनी अर्ज दाखल केले आहेत. २७ जानेवारी दुपारी ३ वाजेपर्यंत अर्ज मागे घेण्याची मुदत आहे.

नाणीज गणातील जागा बिनविरोध शक्य
रत्नागिरी तालुक्यातील नाणीज पंचायत समिती गणामधून शिवसेनेच्यावतीने डॉ. पद्मजा संजय कांबळे यांना उमेदवारी देण्यात आली होती. त्यांच्या विरोधात कोणत्याच पक्षाने उमेदवार न दिलेला नाही. या गणात एकच अर्ज आला आहे. त्यामुळे त्यांची निवड बिनविरोध होण्याची शक्यता आहे. राज्यातील अशी पहिलीच जागा असल्याची माहिती पुढे आली आहे.