19658

‘आम्ही साहित्यप्रेमी’तर्फे
३० ला ‘सुर्वे यांचे विद्यापीठ’
सकाळ वृत्तसेवा
सिंधुदुर्गनगरी, ता. २३ : ''आम्ही साहित्यप्रेमी'' या साहित्यिक व्यासपीठाच्या जानेवारीतील मासिक कार्यक्रमानिमित्त शुक्रवारी (ता.३०) सायंकाळी ५ वाजता ''सुर्वे यांचे विद्यापीठ'' हा विशेष कार्यक्रम आयोजित करण्यात आला आहे. यात ज्येष्ठ कवयित्री संध्या तांबे कवी नारायण सुर्वे यांच्या साहित्यावर सखोल विचार मांडणार आहेत.
घुंगुरकाठी, सिंधुदुर्गप्रणित ‘आम्ही साहित्यप्रेमी’चा हा सलग अकरावा मासिक उपक्रम असून, ओरोस येथील जैतापकर कॉलनीतील दत्तराज सहकारी सोसायटीच्या सभागृहात कार्यक्रम होणार आहे. कवी नारायण सुर्वे हे मराठी साहित्यविश्वातील स्वतंत्र शैलीचे, मोजके पण अत्यंत प्रभावी लेखन करणारे प्रतिभावंत कवी म्हणून ओळखले जातात. १५ ऑक्टोबर १९२६ ला जन्मलेल्या सुर्वे यांचे २०२६ हे जन्मशताब्दी वर्ष आहे. समाजातील दलित, उपेक्षित व संघर्षमय जीवन जगणाऱ्या माणसांचे वास्तव त्यांनी आपल्या कवितांतून समर्थपणे मांडले. ''ऐसा गा मी ब्रह्म'', ''माझे विद्यापीठ'', ''जाहीरनामा'', ''नव्या माणसाचे आगमन'' हे त्यांचे महत्त्वाचे काव्यसंग्रह होत. त्यांनी उर्दू साहित्यातील अनुवाद आणि इंग्रजीत निवडक कवितांचे भाषांतरही केले आहे. संवादमय शैली आणि संघर्ष करणारा सामान्य माणूस हे त्यांच्या कवितेचे केंद्रबिंदू राहिले. या कार्यक्रमात संध्या तांबे सुर्वे यांच्या कवितेतील विविध पैलूंवर प्रकाश टाकणार आहेत. कार्यक्रम सर्व रसिकांसाठी खुला असून, उपस्थित राहावे, असे आवाहन समन्वयक सतीश लळीत व डॉ. सई लळीत यांनी केले आहे.