दुचाकी चोरट्यास अटक
सकाळ वृत्तसेवा
दापोली, ता. २४ ः शहरातील रसिकरंजन नाट्यगृह परिसरातून दुचाकीची चोरी प्रकरणी दापोली पोलिसांनी एका संशयित तरुणाला अटक केली. किरण संतोष हिलम (वय २२, रा. माणगाव-दत्तनगर, ता. महाड, रायगड) असे अटक करण्यात आलेल्या संशयिताचे नाव आहे.
पोलिसांनी दिलेली माहिती, जालगाव येथील रहिवासी जितेंद्र काशिनाथ चव्हाण यांनी दुचाकी २१ जानेवारीला सकाळी सुमारे ११ वा. रसिक रंजन नाट्यगृहाशेजारील दुकानासमोरील मोकळ्या जागेत उभी केली होती. काही वेळाने परत आल्यानंतर त्यांना दुचाकी दिसली नाही. याबाबत त्यांनी दापोली पोलिस ठाण्यात तक्रार दाखल केली होती. या तक्रारीनुसार अज्ञाताविरोधात गुन्हा दाखल करण्यात आला होता. तपासा दरम्यान घटनास्थळ परिसरातील सीसीटीव्ही फूटेजची पाहणी करून तपासाला गती देण्यात आली. सीसीटीव्हीमध्ये दिसणारा तरुण हर्णै येथे २३ जानेवारीला रात्री संशयास्पदरीत्या फिरताना दिसला. पोलिसांनी त्याला ताब्यात घेतले. त्याची चौकशी केली असता त्याने दुचाकी चोरल्याची कबुली दिली. त्यानंतर चोरीस गेलेली दुचाकी पोलिसांनी जप्त केली.