सिंधुदुर्गनगरीत आज
नियोजन समितीची सभा
सकाळ वृत्तसेवा
ओरोस, ता. १० ः जिल्हा नियोजन समितीची सभा उद्या (ता. ११) सकाळी ११ वाजता येथील जिल्हा नियोजन समिती सभागृहात आयोजित करण्यात आली आहे. पालकमंत्री नीतेश राणे यांच्या अध्यक्षतेखाली होणाऱ्या या सभेला खासदार नारायण राणे, माजी मंत्री आमदार दीपक केसरकर, आमदार नीलेश राणे, जिल्हाधिकारी तृप्ती धोडमिसे, मुख्य कार्यकारी अधिकारी रवींद्र खेबुडकर, जिल्हा पोलिस अधीक्षक डॉ. मोहन दहिकर आदी उपस्थित राहणार आहेत. या सभेमध्ये २०२५-२६ या आर्थिक वर्षातील मंजूर निधी खर्चाचा आढावा घेतला जाणार आहे. आर्थिक वर्ष संपायला अद्याप दीड महिना शिल्लक आहे. पालकमंत्री राणे यांच्या संकल्पनेनुसार मंजूर निधी फेब्रुवारी अखेर खर्च झाला पाहिजे, तर मार्च अखेर राज्याकडून अधिकचा निधी आणता येईल. त्या दुष्टीने या सभेत आढावा घेतला जाणार आहे. तसेच २०२६-२७ या आर्थिक वर्षाचा आराखडा तयार केला जाणार आहे. त्या अनुषंगाने सर्व विभागांकडून कामांची यादी मागवून घेत आराखडा तयार करण्यासाठी चर्चा केली जाणार आहे. त्यामुळे ही सभा महत्त्वाची मानली जात आहे.