23699

ॲड. परुळेकरांना
‘प्र. श्री. नेरुरकर’
पुरस्कार जाहीर
बांदा, ता. १० ः येथील नट वाचनालयातर्फे देण्यात येणारा प्रतिष्ठेचा ‘प्र. श्री. नेरुरकर साहित्यिक पुरस्कार’ यंदा वेंगुर्ले येथील प्रसिद्ध संत साहित्यिक तथा लेखक ॲड. देवदत्त परुळेकर यांना जाहीर झाला आहे. हा पुरस्कार वाचनालयाच्या सभागृहात शनिवारी (ता. १४) दुपारी ४ वाजता आयोजित विशेष समारंभात प्रदान करण्यात येणार आहे. ॲड. परुळेकर यांनी संत साहित्य क्षेत्रात उल्लेखनीय योगदान दिले आहे. त्यांनी ओवी, अभंग, संतकाव्य, भक्तीपर लेखन तसेच विविध माध्यमांतून साहित्यसेवा सातत्याने सुरू ठेवली आहे. त्यांच्या लेखनातून अध्यात्म, भक्ती आणि संस्कृतीचा ठसा ठळकपणे जाणवतो. दैनिकांमधील लेखमालिका, साहित्यिक सदरे तसेच सोशल मीडियावरील कार्यक्रमांमुळे त्यांनी संत साहित्य सर्वसामान्य वाचकांपर्यंत पोहोचविण्याचे मोठे कार्य केले आहे. ते विविध सामाजिक-साहित्यिक संस्थांमध्ये पदाधिकारी म्हणून कार्यरत आहेत. अनेक व्याख्याने, प्रवचने व कीर्तने सादर केली आहेत. त्यांच्या साहित्यिक योगदानाची दखल घेत नट वाचनालयाने यंदाचा पुरस्कार त्यांना जाहीर केल्याची माहिती कार्यकारी मंडळाने दिली. या पुरस्कार वितरण सोहळ्यास साहित्यप्रेमी, मान्यवर व नागरिकांनी मोठ्या संख्येने उपस्थित राहावे, असे आवाहन करण्यात आले आहे.