24536

चढावर ताबा सुटल्यामुळे
अवजड ट्रकला अपघात

ओटवणे तिठा येथील घटना

सकाळ वृत्तसेवा
ओटवणे, ता. १४ ः ओटवणे तिठा येथे आज पहाटेच्या सुमारास मालवाहू ट्रकला अपघात झाला. कोल्हापूरहून गोव्याच्या दिशेने लोखंड घेऊन जाणाऱ्या या ट्रकचा चढावर ताबा सुटल्याने हा अपघात घडला. सुदैवाने यात कोणतीही हानी झाली नाही.
अधिक माहिती अशी, कोल्हापूर येथून लोखंडी माल भरून एक ट्रक गोव्याच्या दिशेने जात होता. विलवडे येथील राजा शिवाजी विद्यालयाच्या नजीक असलेल्या ओटवणे तिठा येथील तीव्र चढावर ट्रक आला असता मालाच्या वजनामुळे ट्रकचा पुढील भाग अचानक उचलला. त्यामुळे ट्रकच्या मागील बाजूस असलेले लोखंड वेगाने खाली आले. सुदैवाने यावेळी ट्रकच्या पाठीमागे कोणतेही वाहन किंवा प्रवासी नसल्याने अनर्थ टळला. घटनास्थळी स्थानिक ग्रामस्थांची गर्दी झाली होती. बचाव पथक दाखल झाले होते. या रस्त्याचे काँक्रीट बांधकाम सुरू आहे. या कामासाठी ठिकठिकाणी खोदाई केल्याने व योग्य नियोजन नसल्याने किरकोळ अपघातांचे प्रमाण वाढले आहे.