24903

कणकवलीत चार फुटी
विषारी घोणस आढळला

कणकवली, ता. १६ : शहरातील फौजदारवाडी परिसरात एका विषारी घोणस सापाने दर्शन दिल्याने नागरिकांची मोठी धावपळ उडाली. येथील रहिवासी नवनीत बागवे यांच्या घराशेजारी असलेल्या अडगळीच्या ठिकाणी हा साप आढळला. घराशेजारील मांजर अचानक जोरजोराने ओरडू लागल्यामुळे घरातील सदस्यांचे लक्ष त्या बाजूला गेले आणि हा साडेचार फूट लांबीचा विषारी साप निदर्शनास आला. सर्पमित्र अवधूत पाटील व दत्तू मेस्त्री यांनी तातडीने घटनास्थळी धाव घेतली. त्यांनी अत्यंत कौशल्याने विषारी सापाला सुरक्षितरीत्या पकडले. सर्पमित्रांनी दिलेल्या माहितीनुसार, वनविभागाच्या मार्गदर्शनाखाली या सापाला त्याच्या नैसर्गिक अधिवासात सुरक्षितपणे सोडण्यात आले. सर्पमित्रांच्या या तत्परतेमुळे संभाव्य धोका टळल्याने स्थानिकांनी त्यांचे आभार मानले.