बी. के. गोंडाळ यांच्या
विचारांचा वारसा पुढे नेऊया
शीळमध्ये शोकसभा ; स्मृती जतन करण्याचा निर्धार
सकाळ वृत्तसेवा
राजापूर, ता. २१ ः (कै.) बी. के. गोंडाळ यांनी लावलेले हे ज्ञानाचे रोपटे जोपासणे आणि त्यांच्या विचारांचा वारसा पुढे नेणे, हीच त्यांना खरी श्रद्धांजली ठरेल, अशा शब्दात शीळ येथे दिवगंत बी. के. गोंडाळ यांना श्रद्धांजली वाहण्यात आली. त्यांच्या चिरंतन स्मृती जतन करण्याचा निर्धार करण्यात आला.
शहरानजीकच्या शीळचे रहिवासी, ज्ञानसागर वाचनालयाचे संस्थापक अध्यक्ष आणि जुवाठी हायस्कूलचे शिक्षक बी. के. गोंडाळ यांचे नुकतेच निधन झाले. यानिमित्त ज्ञानसागर वाचनालय येथे शोकसभा झाली. या वेळी वाचनालयाचे अध्यक्ष गोपाळ गोंडाळ, गोंडाळ यांचा मित्रपरिवार, संस्थांचे प्रतिनिधी, वाचनालय परिवार व घरपरिवारातील सदस्य, ग्रामस्थ उपस्थित होते.
वाचनालयाचे सचिव संतोष मोंडे यांनी त्यांचा अल्प परिचय आणि कार्याचा आढावा घेतला. त्यानंतर माध्यमिक शिक्षक संतोष हातणकर, रवींद्र नागरेकर, सर्वोदय प्रतिष्ठानचे वासुदेव गोंडाळ, माय राजापूरचे जगदीश पवार, राजापूर प्रतिष्ठानचे अध्यक्ष मोहन पाडावे, दिशा परिवाराचे जोशी, जुवाठी मित्रपरिवारातील संदीप घेवडे आदींनी त्यांच्या आठवणींना उजाळा दिला.