राजापुरात मंडळ स्तरावर समाधान शिबिरे
राजापूर ः ग्रामीण भागात सर्वसामान्य जनता, शेतकरी, विद्यार्थी व महिला यांचे महसूल विभागांशी संबंधित दैनंदिन प्रश्नांचे निराकरण करताना जनतेच्या तक्रारी सत्वर निकाली काढण्याच्या उद्देशाने तालुक्यामध्ये छत्रपती शिवाजी महाराज महाराजस्व समाधान शिबिरांचे आयोजन करण्यात आले आहे. त्याअनुषंगाने ७, १४ मार्च, १० आणि १७ एप्रिल या कालावधीत मंडळ स्तरावर शिबिरांचे आयोजन करण्यात आले आहे. समाधान शिबिरामध्ये एक खिडकी प्रणाली राबविणे आवश्यक असून त्यासाठी सर्व महसूल अधिकारी एकाच ठिकाणी उपलब्ध राहून नागरिकांना त्वरित सेवा देणार आहेत. याशिवाय या शिबिरामध्ये ई-मोजणी, अ‍ॅग्रीस्टॅक, पीएम किसान, तक्रार निवारण आदी सुविधाही उपलब्ध करून देण्यात येणार आहे. त्यामुळे शिबिरांचा लाभ घ्यावा, असे आवाहन महसूल विभागाने केले आहे.