27539

व्हॉलीबॉल, खो-खो स्पर्धेत
‘तोंडवली नर्सिंग’ उपविजेता

सकाळ वृत्तसेवा
नांदगाव, ता. २७ ः श्री अनंत स्मृती चॅरिटेबल ट्रस्ट संचलित इन्स्टिट्यूट ऑफ नर्सिंग कसाल आयोजित सिंधुदुर्ग, रत्नागिरी इंटर कॉलेज व्हॉलीबॉल व खो-खो स्पर्धेत तोंडवली कॉलेजच्या विद्यार्थ्यांनी उपविजेतेपद पटकावले.
रत्नागिरी, सिंधुदुर्ग जिल्ह्यातील नर्सिंग महाविद्यालयीन विद्यार्थ्यांच्या खो-खो व व्हॉलीबॉल इंटर कॉलेज स्पर्धा नुकत्याच कसाल नर्सिंग कॉलेजच्या पटांगणात झाल्या. यामध्ये श्री सरस्वती कॉलेज ऑफ नर्सिंग तोंडवलीच्या विद्यार्थ्यांनी सर्वोत्कृष्ट सांघिक खेळाच्या जोरावर खो-खो स्पर्धेत अंतिम सामन्यात दमदार खेळ केला; मात्र उपविजेतेपदावर समाधान मानावे लागले. व्हॉलीबॉल स्पर्धेत मुलींनी द्वितीय क्रमांक पटकावला. या विद्यार्थ्यांना प्रा. सागर भोसले, दीपिका गोसावी, लखन चव्हाण, उमेश वडर, अक्षय पवार यांचे मार्गदर्शन लाभले. उपविजेतेपद पटकाविलेल्या दोन्ही संघांचे खेळाडू, प्रशिक्षक व मार्गदर्शन करणाऱ्या शिक्षकांचे संस्थाध्यक्ष वसंत सावंत, सचिव निखिल सावंत, प्रा. शकुंतला नागराज यांनी अभिनंदन करून शुभेच्छा दिल्या.