27739

ग्रंथालयांना सक्षम करणे आवश्यक

महादेव प्रभू ः मुणगेत मराठी भाषा गौरव दिन

मुणगे, ता. २८ ः ‘‘केंद्राने मराठी भाषेला अभिजात दर्जा दिला. मात्र, त्यासाठी आवश्यक निधी अद्यापपर्यंत राज्याला दिला नाही. केवळ अभिजात भाषेचा दर्जा देऊन उपयोग नाही. शासन आज सार्वजनिक ग्रंथालयांना मराठी भाषा गौरव दिन यांसारखे अनेक सांस्कृतिक कार्यक्रम साजरे करायला सांगत आहे; मात्र ग्रामीण भागातील ग्रंथालये तुटपुंज्या अनुदानामध्ये असे कार्यक्रम करू शकत नाहीत. शासन ग्रंथालयांच्या समस्या गांभीर्याने घेत नसल्याने सार्वजनिक ग्रंथालये व ग्रंथालय कर्मचारी आर्थिक संकटात आहेत,’’ असे प्रतिपादन येथील श्री भगवती वाचनालयाचे उपाध्यक्ष महादेव ऊर्फ तात्या प्रभू यांनी केले.
‘‘महाराष्ट्राच्या साहित्यिक आणि सांस्कृतिक क्षेत्रात कवी कुसुमाग्रज यांचे मोठे योगदान आहे. मराठी भाषेचा शिक्षणामध्ये प्रसार व्हावा आणि बोलीभाषेला महत्त्वाचे स्थान मिळावे, यासाठी कुसुमाग्रजांनी आयुष्यभर प्रयत्न केले. मराठी ही राजभाषा असून तिचे संवर्धन आणि जास्तीत जास्त लेखन होण्याच्या उद्देशाने समाजातील प्रत्येक घटकाने योगदान दिले पाहिजे,’’ असेही ते म्हणाले. वाचनालयाच्यावतीने आयोजित मराठी भाषा गौरव दिन कार्यक्रमाच्या अध्यक्षस्थानावरून बोलत होते.
श्री भगवती वाचनालयात हा कार्यक्रम झाला. यावेळी कुसुमाग्रजांच्या प्रतिमेला श्री. प्रभू यांच्या हस्ते पुष्पहार अर्पण करण्यात आला. यावेळी वाचनालयाचे कार्यकारी सदस्य संतोष लब्दे, संजय परुळेकर, धर्माजी आडकर, उज्ज्वला महाजन, तसेच ग्रंथपाल विश्वास मुणगेकर, सोमनाथ रुपे, सौ. मुणगेकर आणि वाचकवर्ग उपस्थित होता. उज्ज्वला महाजन यांनी आभार मानले.