27778

घारपी शाळेत मराठी भाषा गौरव दिन
बांदा, ता.२८ : घारपी येथील जिल्हा परिषद प्राथमिक शाळेत मराठी भाषा गौरव दिन उत्साहात साजरा करण्यात आला. ज्ञानपीठ पुरस्कार विजेते थोर कवी कुसुमाग्रज यांच्या जयंतीनिमित्त आयोजित कविता गायन स्पर्धेने संपूर्ण शाळा परिसर अक्षरशः सुरांनी न्हाऊन निघाला.
कार्यक्रमाची सुरुवात कुसुमाग्रजांच्या प्रतिमेचे पूजन व दीपप्रज्वलनाने झाली. त्यानंतर विद्यार्थ्यांनी मंचावर येत मराठी कवितांचा गोडवा आपल्या सुरेल आवाजातून साकारला. ‘कणा’ सारख्या प्रेरणादायी कवितांपासून ते निसर्ग, मातृभाषा आणि देशभक्ती व्यक्त करणाऱ्या विविध विषयांवरील कविता विद्यार्थ्यांनी लयबद्ध सादर केल्या. यावेळी विद्यार्थ्यांकडून पाठ्यपुस्तकातील कवितांचे हावभावयुक्त आणि अर्थपूर्ण सादरीकरण घेण्यात आले. प्रत्येक ओळीतून व्यक्त होणारा भाव, चेहऱ्यावरची निरागस अभिव्यक्ती आणि स्पष्ट उच्चार यामुळे सादरीकरण अधिक प्रभावी ठरले. या काव्यगायन स्पर्धेचा निकाल असा ः गट पहिली ते दुसरी - मानस नाईक, किर्ती गावकर, श्रेया असनोडकर, यज्ञा कविटकर, सौम्या गावडे, गट तिसरी चौथी -स्वप्निल गावडे, गार्गी गावडे, रूची नाईक, रूद्र सावंत, समर्थ कविटकर, गट पाचवी ते सातवी -वैष्णवी गावडे, इशिका असनोडकर, स्वप्नाली गावडे, यशस्वी सावंत, बाबाजी कविटकर, भिकाजी नाईक, बळीराम गावडे, सिद्धी कविटकर, राज गावडे.
मुख्याध्यापक जे.डी.पाटील व सहकारी शिक्षक आशिष तांदुळे, मुरलीधर उमरे, धर्मराज खंडागळे यांनी विशेष परिश्रम घेतले.