विकासकामांचे भूमिपूजन रखडले
सकाळ वृत्तसेवा
चिपळूण, ता. ३ : येथील नगरपालिका हद्दीतील कामांचे भूमिपूजन २६ फेब्रुवारीला नंतर ते १ मार्चला करण्याचे जाहीर झाले होते. मात्र रविवारचा हा कार्यक्रमही रद्द करण्यात आला आहे.
जिल्हास्तर नगरोत्थान योजना, विशेष रस्ता अनुदान, मागासवर्गीय कल्याण समिती आणि नगरपरिषद निधीअंतर्गत आर.सी.सी. गटारे, संरक्षक भिंती आणि रस्त्यांच्या डांबरीकरणाची कामे प्रस्तावित आहेत. पेठमाप येथे मोठ्या उत्साहात भूमिपूजनाचा कार्यक्रम आयोजित करण्यात आला होता. यासाठी पालकमंत्री उदय सामंत, राज्यमंत्री योगेश कदम, आमदार शेखर निकम, आमदार नीलेश राणे आदी उपस्थित राहणार होते. पालकमंत्र्यांना मुंबईत तातडीच्या शासकीय कामानिमित्त थांबावे लागल्याने कार्यक्रम रद्द करण्यात आल्याचे मुख्याधिकारी संजय जाधव यांनी स्पष्ट केले. याप्रसंगी मराठी भाषा दिनानिमित्त काव्यवाचन स्पर्धेचे पारितोषिक वितरण व ११ ज्येष्ठ साहित्यिकांचा सन्मान होणार होता. मात्र हा कार्यक्रम रद्द झाल्याने साहित्यप्रेमींतही नाराजीचा सूर उमटला आहे.
----