शीळमध्ये ‘खुणा शोधण्याचा’ सोहळा
मंगळवारी ब्राह्मणदेव-पावणादेवी पालखीची पारंपरिक प्रथा
सकाळ वृत्तसेवा
राजापूर, ता. ७ : शहरानजीकच्या शीळ येथील श्री ब्राह्मणदेव-पावणादेवी पालखीचा पारंपरिक ‘खुणा शोधण्याचा’ कार्यक्रम मंगळवार, १० मार्च रोजी होणार आहे. सतीचा मळा येथे सकाळी ८ वाजता होणाऱ्या या अनोख्या प्रथेचा थरार ‘याची देही याची डोळा’ अनुभवण्याची संधी भाविकांना मिळणार आहे.
कोकणातील शिमगोत्सवामध्ये उत्सवानंतर ‘खुणा’ शोधण्याची किंवा घालण्याची प्रथा पिढ्यानपिढ्या चालत आली आहे. उत्सवाच्या सांगतेवेळी विशिष्ट ठिकाणी लपवलेली ‘खूण’ ग्रामदेवतेची पालखी शोधून काढते. शिमगोत्सवात देवाचे कार्य कोणतीही चूक न होता निर्विघ्नपणे पार पडले आहे की नाही, याची खातरजमा खुद्द ग्रामदेवतेकडून करून घेण्यासाठी ही प्रथा पाळली जाते, अशी ग्रामस्थांची श्रद्धा आहे.
शीळ येथे काही दिवसांपूर्वीच ग्रामदेवता श्री नवलादेवीच्या पालखीने ही खूण शोधली होती. त्यानंतर आता श्री ब्राह्मणदेव-पावणादेवीची पालखी परंपरेनुसार तिसऱ्या वर्षी ही खूण काढणार आहे. ग्रामदेवतेप्रति असलेली श्रद्धा दृढ करणारी ही प्रथा राजापूर तालुक्यातील अनेक गावांमध्ये आजही तितक्याच उत्साहात सुरू आहे. या प्रथेविषयी ग्रामीण भागात अनेक रंजक कथा सांगितल्या जातात, त्यामुळे भाविकांमध्ये या सोहळ्याविषयी मोठे कुतूहल असते. या दैवी शक्तीचा अनुभव घेण्यासाठी आणि दर्शनासाठी भाविकांनी मोठ्या संख्येने उपस्थित राहावे, असे आवाहन श्री ब्राह्मणदेव सेवा मंडळाचे व्यवस्थापक नागरेकर, पुजारी, भोवड आणि भंडारी बंधूंनी केले आहे.