29564

परुळे येथे महिला दिनी
रॅलीला उत्स्फूर्त प्रतिसाद
म्हापण ः परुळे पंचक्रोशीतील महिलांनी आज जागतिक महिला दिन उत्साहात साजरा केला. यानिमित्त परुळे येथे काढलेल्या रॅलीमध्ये बहुसंख्य महिला उत्स्फूर्तपणे सहभागी झाल्या. यामध्ये महिलांनी सावित्री फुले, माता जिजाऊ, राणी लक्ष्मीबाई अशी वेशभूषा साकारली. नऊवारी साडी, नाकात नथ अशा पारंपरिक पेहराव करून ढोल वादन करणाऱ्या युवती या रॅलीचे खास आकर्षण ठरल्या. माड्याचीवाडी हायस्कूलच्या मुलांच्या ढोल-ताशाच्या गजरात रॅली उत्साहात झाली. वराटी मंगल कार्यालयात झालेल्या कार्यक्रमात पंचक्रोशीतील अनेक महिलांनी कलाविष्कार सादर केले. अरुणा सामंत यांच्या मालवणी गाऱ्हाण्याने या कार्यक्रमास सुरुवात झाली. मांजर्डेवाडी ग्रुपचे वारकरी भजन, आजारवाडी ग्रुपचे कोळी नृत्य आणि समूह नृत्य बहारदार होते. कल्पना सामंत आणि अनुराधा सामंत यांची सुमधुर गाणी, कविता जोशी आणि रिद्धी प्रभू यांचे ''ओल्ड इज गोल्ड'', दीपा तुळसकर यांचे जोगवा नृत्य लक्षवेधी ठरले. यानिमित्त जिल्हा परिषद सदस्य यज्ञा साळगावकर, रुग्ण सेवाचे दीपा तुळसकर, उद्योजिका विद्या राणे यांचा सत्कार करण्यात आला. रश्मी सामंत, सानवी देसाई यांनी सूत्रसंचालन केले. सुरेखा तेली यांनी प्रास्ताविक केले. अंजली तेली यांनी आभार मानले.