सावंतवाडी येथे शुक्रवारी
‘नारी अभ्युदय महोत्सव’

सकाळ वृत्तसेवा
सावंतवाडी, ता. १० ः सिंधुदुर्ग जिल्ह्यातील सामाजिक आणि सांस्कृतिक क्षेत्रात आपली स्वतंत्र ओळख निर्माण करणाऱ्या ‘वेताळ प्रतिष्ठान, सिंधुदुर्ग-तुळस’ या संस्थेच्यावतीने ‘नारी अभ्युदय महोत्सव’ या विशेष कार्यक्रमाचे आयोजन केले आहे. आंतरराष्ट्रीय महिला दिनाचे औचित्य साधून शुक्रवारी (ता. १३) सायंकाळी ५ वाजता येथील जगन्नाथराव भोसले उद्यान येथे हा कार्यक्रम होणार आहे.
या महोत्सवाच्या माध्यमातून जिल्ह्यातील कर्तृत्ववान स्त्रियांच्या कार्याचा गौरव करण्यात येणार आहे. ​या कार्यक्रमासाठी प्रमुख अतिथी म्हणून प्रसिद्ध सामाजिक कार्यकर्त्या वेदिका परब उपस्थित राहणार असून, त्यांच्या उपस्थितीत जिल्ह्यातील विविध क्षेत्रांतील महिलांचा गौरव केला जाणार आहे. नवनिर्वाचित पंचायत समिती व जिल्हा परिषद महिला सदस्यांचा विशेष सन्मान तसेच इतर सामाजिक, शैक्षणिक आणि इतर क्षेत्रांत उल्लेखनीय कार्य केलेल्या महिलांचा सन्मान करण्यात येईल. महिलांसाठी पारंपरिक ‘हळदी-कुंकू’ समारंभ, महिलांच्या कलागुणांना वाव देण्यासाठी ‘सौभाग्य संध्या’ हा विशेष मनोरंजनात्मक कार्यक्रम सादर केला जाईल. या महोत्सवास सावंतवाडी आणि परिसरातील महिलांनी व नागरिकांनी मोठ्या संख्येने उपस्थित राहावे, असे आवाहन वेताळ प्रतिष्ठान, सिंधुदुर्ग-तुळस यांच्यावतीने करण्यात आले आहे.