‘फॉरेन रिटर्न नमन’चा
चिपळूणमध्ये शो
चिपळूण, ता. १६ ः कोकणातील पारंपरिक लोककला जपण्यासाठी वाशिष्ठी डेअरीच्यावतीने गुढीपाडव्याच्या निमित्ताने खास ‘फॉरेन रिटर्न नमन’ या लोकनाट्याचा कार्यक्रम आयोजित करण्यात आला आहे. हा कार्यक्रम गुरुवारी (ता. १९) रात्री ९ वा. शहरातील इंदिरा गांधी सांस्कृतिक केंद्रांत रंगणार आहे. कोकणातील पारंपरिक लोकनाट्य प्रकार असलेले नमन हे आपल्या विनोदी शैली, सामाजिक संदेश आणि सांस्कृतिक परंपरेमुळे प्रेक्षकांचे विशेष आकर्षण ठरते. या कार्यक्रमात सादर होणारे ‘फॉरेन रिटर्न नमन’ हे विशेष वैशिष्ट्यपूर्ण असून, इतिहासात प्रथमच परदेशात सादर झालेल्या कोकणातील नमन प्रकाराचा हा मानाचा कार्यक्रम असल्याचे आयोजकांकडून सांगण्यात आले आहे. या नमनाला ‘महाराष्ट्र महोत्सव २०२५’ मध्ये सर्वोत्तम नमन हा मानाचा पुरस्कार मिळालेला आहे. या कार्यक्रमाला प्रवेश विनामूल्य आहे.