गणपतीपुळेत खिचडी प्रसाद वेळेत वाढ
सकाळ वृत्तसेवा
रत्नागिरी, ता. २५ ः पश्चिम आशियातील इराण आणि इस्रायल यांच्या सुरू असलेल्या युद्धजन्य परिस्थितीमुळे जिल्ह्यात सर्वत्र व्यावसायिक गॅसटंचाईला सामोरे जावे लागत आहे. या पार्श्वभूमीवर गणपतीपुळे येथील संस्थान श्रीदेव गणपतीपुळे प्रशासनाने भाविकांची गैरसोय टाळण्यासाठी खिचडी प्रसाद भोजनाची वेळ एक तासाने वाढवली आहे.
देवस्थानने भाविकांच्या सोयीसाठी नवीन वेळापत्रक जाहीर केले आहे. दुपारी साडेबारा ते ३ वाजेपर्यंत आणि सायंकाळी सव्वासात ते रात्री पावणेआठपर्यंत मोफत महाप्रसाद उपलब्ध करून दिला जाणार आहे. इराणमधील युद्धामुळे व्यावसायिक गॅसचा पुरवठा विस्कळीत झाला आहे. पुरवठा बंद असल्यामुळे गणपतीपुळे परिसरातील अनेक हॉटेल्स आणि खानावळी सद्यःस्थितीत बंद आहेत. त्यामुळे दर्शनासाठी येणाऱ्या हजारो भाविकांच्या जेवणाचा प्रश्न निर्माण झाला असून, त्यांची गैरसोय होत आहे. भाविकांची गैरसोय लक्षात घेऊन देवस्थानच्या पंचकमिटीने सामाजिक बांधिलकी जपत दररोज दिल्या जाणाऱ्या मोफत खिचडी प्रसाद भोजनाच्या वेळेत वाढ करण्याचा निर्णय घेतला आहे जेणेकरून या संकटाच्या काळात जास्तीत जास्त भाविकांना अन्नाचा लाभ घेता येईल. हॉटेल व्यावसायिक अडचणीत असताना देवस्थानने उचललेले पाऊल भाविकांसाठी आधार ठरत आहे. जास्तीत जास्त भाविकांनी याचा लाभ घेण्याचे आवाहन गणपतीपुळे देवस्थान कमिटीने केले आहे.