swt2615.jpg
33465
सावंतवाडी ः येथील पेट्रोल पंपावर लागलेल्या रांगा.

इंधन टंचाईच्या अफवांना उधाण
पेट्रोलसाठी झुंबड : पंपावर रांगाच्या रांगा
सकाळ वृत्तसेवा
सावंतवाडी, ता. २६ : आखाती देशांतील युद्धजन्य परिस्थितीच्या पार्श्वभूमीवर इंधन टंचाई निर्माण होईल, या भीतीने येथील पेट्रोल पंपांवर नागरिकांची मोठी झुंबड उडाली आहे. ग्रामीण भागातील काही पंपांवर इंधनाचा पुरवठा होण्यास विलंब झाल्याने तुटवड्याची अफवा पसरली. परिणामी, शहरातील पेट्रोल पंपांवर कडक उन्हातही वाहनधारकांच्या लांबच लांब रांगा पाहायला मिळत आहेत.
आखाती देशांतील तणावामुळे इंधन टंचाई भासणार, अशी चर्चा सर्वत्र सुरू आहे. ग्रामीण भागातील पंपांवर इंधन पोहोचण्यामध्ये काहीसा खंड पडल्याने ‘पेट्रोल संपले आहे’ अशा अफवांना उधाण आले. याचा थेट परिणाम शहरातील पेट्रोल पंपांवर दिसून येत असून, गेल्या दोन दिवसांपासून ही गर्दी कायम आहे. आज सकाळपासूनच वाहनधारकांनी पेट्रोल भरण्यासाठी रांगा लावल्या होत्या; मात्र, ‘‘पंपावर मुबलक साठा उपलब्ध असून नागरिकांनी घाबरण्याचे कारण नाही,’’ असे कर्मचाऱ्यांकडून सांगण्यात येत आहे. अनेक वाहनधारक भविष्यातील अडचण टाळण्यासाठी आपल्या वाहनांच्या टाक्या ‘फुल्ल’ करून घेताना दिसत आहेत.

चौकट
जिल्हाधिकाऱ्यांचे आवाहन
दुसरीकडे, संपूर्ण सिंधुदुर्ग जिल्ह्यात पेट्रोल आणि डिझेलचा पुरेसा साठा उपलब्ध आहे. नागरिकांनी कोणत्याही अफवांवर विश्वास ठेवू नये. अनावश्यक गर्दी टाळून केवळ गरजेनुसारच इंधन खरेदी करावे, असे आवाहन जिल्हाधिकारी तृप्ती धोडमिसे यांनी केले आहे.