चिपळुणात गुरुवारपासून चैतावली उत्सव
पालख्यांचे स्नेहमिलन ; हजारो भाविकांची गर्दी
सकाळ वृत्तसेवा
चिपळूण, ता. २७ ः कोकणातील शिमगोत्सवाचा आनंद ओसरल्यानंतर आता चिपळूणसह ग्रामीण भागातील भाविकांना वेध लागले आहेत ते ग्रामदेवतांच्या ‘चैतावली’ उत्सवाचे. सांस्कृतिक परंपरेचा वारसा जपणाऱ्या या उत्सवाचा प्रारंभ २ एप्रिलपासून होत असून, तालुक्यात ढोलताशांच्या गजरात आणि भक्तीमय वातावरणात हा सोहळा रंगणार आहे. चैतावली उत्सव म्हणजे केवळ धार्मिक विधी नसून, तो कोकणच्या संस्कृतीचे दर्शन घडवणारा सोहळा आहे. या उत्सवात ग्रामदेवतांच्या पालख्या एकमेकांच्या भेटीला जातात. रात्रीच्यावेळी होणारा पालख्यांचा हा नेत्रदीपक भेटीचा सोहळा, आकर्षक विद्युत रोषणाई, पालख्या नाचवणे आणि ढोलवाद्यांची जुगलबंदी पाहण्यासाठी हजारो भाविकांची गर्दी होते. २ एप्रिलला हनुमान जयंतीचा उत्सव पोसरे आणि कापसाळ येथे होणार आहे. कोंढे येथे ३ला, ४ला रेहळे आणि रामपूर चव्हाणवाडीत, ५ला दोनवली आणि मिरजोळी येथे, ६ला भोम गावात, ७ला मजरेकौंढर नवरतवाडी आणि पाचाड येथे, ९ला वैजी येथे, १०ला कात्रोळी देऊळवाडीत, १२ला कात्रोळी लायकवाडी, शिरळला १३ला तर रामपूर केदारनाथ तळ्याचीवाडी येथे १४ एप्रिलला उत्सव होईल.