सावर्डेत आज ग्रंथप्रकाशन सोहळा
संत रोहिदास महाराज जयंती ; सांस्कृतिक कार्यक्रमांचे आयोजन
सकाळ वृत्तसेवा
चिपळूण, ता. २८ ः सावर्डे येथील माता शारदा फाउंडेशनतर्फे संत शिरोमणी रोहिदास महाराज यांच्या ६५०व्या जयंतीनिमित्त ग्रंथ प्रकाशन सोहळ्याचे उद्या (ता. २९) आयोजन केले आहे. दुपारी ३ ते ६.३० वा. इंदिरा गांधी सांस्कृतिक केंद्रात हा कार्यक्रम होणार आहे. या वेळी अदृश्य श्री. काडसिद्धेश्वर महाराज यांचे मार्गदर्शन लाभणार आहे. याचवेळी त्यांच्या हस्ते ग्रंथ प्रकाशित होणार आहे. उद्या दुपारी ३ ते ३.३० वा. विविध संतांच्या पालख्यांचे आगमन व स्वागत होणार आहे. ३.३० ते ५.१५ संत रोहिदास महाराजांच्या निवडक पदांचे गायन कार्यक्रम होईल. यामध्ये संगीत प्रमोद देशपांडे, गायक राजाभाऊ शेंबेकर, वरद केळकर आणि अनन्या खेराडे हे गायन करणार आहेत. यामध्ये सहकलाकार अमित ओक, प्रथमेश देवधर, गौरव पाटकर, आदित्य खरे, सुश्रुत चितळे, चैतन्य जोगळे आणि निरूपण धनंजय चितळे करणार आहेत. त्यानंतर सायंकाळी ५.१५ ते ६ वा. ग्रंथप्रकाशन व अदृश्य काडसिद्धेश्वर महाराज यांचे मार्गदर्शन लाभणार आहे. सायंकाळी ६ वा. पसायदान गाऊन कार्यक्रमाची सांगता होईल.
कार्यक्रमात सहयोगी संस्था म्हणून लोकमान्य टिळक स्मारक वाचनालय चिपळूण, रोहिदास समाजसेवा संघ चिपळूण, डॉ. बाबासाहेब आंबेडकर वाचनालय चिपळूण, संस्कारभारती चिपळूण, शारदा संगीत, साहित्य, कला, क्रीडा अकादमी सावर्डे आणि ज्ञातीबांधव संस्था व वारकरी सम्प्रदाय सामील होणार आहेत. सर्वांनी या कार्यक्रमाला उपस्थित राहावे, असे आवाहन चंद्रकांत सावर्डेकर यांनी केले आहे.