६५ वर्षांनंतरही पुनर्वसन, रोजगाराचे प्रश्न प्रलंबितच
कोयना प्रकल्पग्रस्त ; जनजागरतर्फे कोळकेवाडीत बैठक
सकाळ वृत्तसेवा
चिपळूण, ता. १ : कोयना प्रकल्पामुळे १९६० पासून चिपळूण तालुक्यातील कोळकेवाडी, पोफळी, नागावे, अलोरे, पेढांबे आणि पिंपळी या गावांतील अनेक शेतकऱ्यांच्या जमिनी संपादित करण्यात आल्या. मात्र, सहा दशकांनंतरही प्रकल्पग्रस्तांना दिलेली आश्वासने पूर्ण झालेली नाहीत. रोजगार, पुनर्वसन आणि नागरी सुविधा यांसारखे मूलभूत प्रश्न अद्याप प्रलंबितच आहेत. या प्रश्नांना वाचा फोडण्यासाठी आता ‘जनजागर प्रतिष्ठान’ने पुढाकार घेतला आहे.
भाजपचे नेते माधव भंडारी यांच्या मार्गदर्शनाखाली कार्यरत असलेल्या जनजागर प्रतिष्ठानने कोळकेवाडी येथे प्रकल्पग्रस्तांची प्राथमिक बैठक घेतली. या बैठकीत ग्रामस्थांच्या समस्या जाणून घेण्यात आल्या. यावेळी पूर्वीच्या नेत्यांनी हे प्रश्न अर्धवट सोडल्याची खंत प्रकल्पग्रस्तांनी व्यक्त केली. आता या प्रश्नांचा शेवटपर्यंत पाठपुरावा व्हावा, अशी अपेक्षा ग्रामस्थांनी व्यक्त केली.
या बैठकीला जनजागर प्रतिष्ठानचे राज्य समन्वयक देवराज देशमुख, कोकण संपर्क प्रमुख दिलीप गायकवाड, दिलीप शिंदे, पांडुरंग शिंदे, शरद शिंदे, अलोरेचे माजी सरपंच प्रकाश मोहिते, अनंत बोलाडे, मोहन कदम, जयवंत शिंदे आदी उपस्थित होते. अनेक वर्षांच्या फसवणुकीमुळे नाराज झालेल्या प्रकल्पग्रस्तांनी आता नव्याने एकत्र येण्याचे आवाहन दिलीप गायकवाड यांनी केले.

चौकट
अलोरेत होणार महामेळावा
पंचक्रोशीतील सर्व प्रकल्पग्रस्तांना एकत्र करून हे दीर्घकाळ प्रलंबित प्रश्न मार्गी लावण्याचा विश्वास ग्रामस्थांनी व्यक्त केला आहे. या मोहिमेचा पुढील टप्पा म्हणून येत्या काही दिवसांत अलोरे येथे प्रकल्पग्रस्तांचा एक मोठा मेळावा आयोजित करण्याची तयारी सुरू असल्याची माहिती माजी सरपंच प्रकाश मोहिते यांनी दिली.