- rat३p७.jpg-
P26O35134
स्वप्ना यादव

स्वप्ना यादव यांचा राज्यस्तरीय गौरव
‘बेस्ट सीईओ’ पुरस्कार प्रदान ; चिपळूण नागरी पतसंस्था
सकाळ वृत्तसेवा
चिपळूण, ता. ३ ः चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना यादव यांना महाराष्ट्र राज्य सहकारी पतसंस्था फेडरेशन, मुंबई यांच्यावतीने प्रतिष्ठेच्या ‘बेस्ट सीईओ’ पुरस्काराने सन्मानित करण्यात आले आहे. सहकार चळवळीत महिलांच्या योगदानाला प्रोत्साहन देण्यासाठी आणि उत्कृष्ट कार्याचा आदर्श निर्माण करण्यासाठी हा पुरस्कार दिला जातो. आज कोल्हापूर येथील आनंद भवन, सायबर कॉलेज येथे हा पुरस्कार प्रदान करण्यात आला.
यादव यांचा २००२ मध्ये चिपळूण नागरी सहकारी पतसंस्थेत अत्यंत सामान्य स्तरावरून प्रवास सुरू झाला. त्यांच्या कार्यकुशलतेमुळे ऑक्टोबर २००६ मध्ये त्यांची ‘व्यवस्थापक (प्रशासन)’ पदावर बढती झाली. त्यानंतर एप्रिल २०१४ मध्ये ‘सरव्यवस्थापक’ आणि जुलै २०१७ पासून ‘मुख्य कार्यकारी अधिकारी’ म्हणून त्यांनी संस्थेची धुरा अत्यंत समर्थपणे पेलली आहे. संस्थेचे संस्थापक-अध्यक्ष सुभाषराव चव्हाण यांच्या कन्या असलेल्या यादव यांनी वडिलांच्या मार्गदर्शनाखाली स्वतःची ओळख निर्माण केली आहे.
यादव यांच्या नेतृत्वाखाली चिपळूण नागरी सहकारी पतसंस्थेने रत्नागिरी जिल्ह्यासह पश्चिम महाराष्ट्रात विस्तार केला असून, आज संस्थेच्या ५० शाखा कार्यरत आहेत. त्यांनी आपल्या कार्यकाळात आर्थिक शिस्त, ग्राहकाभिमुख सेवा आणि पारदर्शक व्यवस्थापन या त्रिसूत्रीवर भर दिला. त्यांच्या कुशल मार्गदर्शनामुळेच संस्था आज महाराष्ट्रातील एक अग्रगण्य पतसंस्था म्हणून नावारूपास आली आहे. संस्थेचे संस्थापक-अध्यक्ष सुभाषराव चव्हाण यांनी यादव यांच्या या यशाबद्दल त्यांचे कौतुक केले आहे.