- rat१७p३.jpg-
26O37879
देवरूख ः राजेंद्र माने अभियांत्रिकी महाविद्यालयात भारतीय हवाई दलातर्फे आयोजित विशेष इंडक्शन पब्लिसिटी प्रोग्रॅममध्ये हवाई दलासंदर्भातील प्रात्यक्षिके पाहताना विद्यार्थी.

हवाई दलाचा अनुभव विद्यार्थ्यांच्या दारी
माने महाविद्यालय ;‘इंडक्शन पब्लिसिटी प्रोग्रॅम’
सकाळ वृत्तसेवा
देवरूख, ता. १७ : देशाच्या सीमांचे रक्षण करणाऱ्या भारतीय हवाई दलाची शौर्यगाथा आणि तेथील करिअरच्या सुवर्णसंधी आता कोकणातील विद्यार्थ्यांच्या दारापर्यंत पोहोचल्या आहेत. आंबव येथील प्रबोधन शिक्षण प्रसारक संस्था संचलित राजेंद्र माने अभियांत्रिकी व तंत्रज्ञान महाविद्यालयात नवी दिल्ली येथील भारतीय हवाई दलातर्फे विशेष ‘इंडक्शन पब्लिसिटी प्रोग्रॅम उत्साहात पार पडला. या वेळी हवाई दलाच्या प्रात्यक्षिकांनी उपस्थित विद्यार्थी भारावले होते.
या उपक्रमाचे वैशिष्ट्य म्हणजे हवाई दलाचे ‘इंडक्शन पब्लिसिटी एक्झिबिशन व्हेइकल’. हे वाहन अत्याधुनिक तांत्रिक साधने आणि फ्लाईट सिमुलेटरने सुसज्ज होते. या द्वारे विद्यार्थ्यांना विमान उड्डाणाचे प्रत्यक्ष अनुभव आणि हवाई दलातील कामकाजाचे जिवंत प्रात्यक्षिक पाहण्याची संधी मिळाली. या वेळी विंग कमांडर करण त्यागी, फ्लाईंग ऑफिसर सितीज सिंघ रावत आणि प्राचार्य डॉ. महेश भागवत उपस्थित होते.